Teknologia albisteak

III. Zernola Olinpiadako festa ospatuko da bihar Bilboko Itsasadarra Itsas Museoan

Armix - Elhuyar Fundazioa

2005-05-19 : 19:05

Elhuyar Fundazioak, www.zernola.net web gunearen bitartez, III. Zernola Olinpiada jarri zuen abian pasa den urrian, Hezkuntza eta Zientzia Ministerioak emandako laguntzari esker. Guztira, Euskal Herriko 61 ikasgela aritu dira lehian ikasturtean zehar, eta, azkenik, Iruñeko Jaso ikastolako DBH 2 gela izan da irabazlea

Euskal Herri osoko 61 ikasgela ibili dira zientzia-lehiaketa honetan hilero, Zernolatik proposatzen genizkien probak ebazten. Olinpiada amaitu berri da, eta Iruñeko Jaso ikastolako DBH 2 gela izan da irabazlea. Bigarren postua Gasteizko Koldo Mitxelena Institutuko 2.A gelak lortu du, eta hirugarrena, berriz, Arrasateko Arizmendi San Viator ikastetxeko 2.T gelak. Olinpiadaren amaiera ospatzeko, festa bat egingo da Bilboko Itsasadarra Itsas Museoan. Han, Titanic ontziari buruzko erakusketa berezia eta museoko erakusketa iraunkorra ikusteaz gain, piraten festa batean parte hartuko dute gerturatuko diren ia 100 umeek. Gainera, txapeldunei saria emango die Garagarro Pirata Ustelak: Espejoko aterpetxean bi eguneko egonaldia, Arabako Foru Aldundiaren Gazteria Sailaren laguntzari esker. Han, Aventura Sobrón taldearen laguntzaz, kanoa, mendi-ibilaldiak, arku-tiroa eta beste hainbat jarduera egiteko aukera izango dute.

ZN Olinpiada abiatu zenetik, hilero-hilero zientzia eta teknologiaren inguruko proba bat gainditu behar izan dute parte-hartzaileek. Probak gelakide guztien artean egiteko izan dira. Hilabete bakoitzeko irabazleek Mantangorrik, Euskaltelek, Donostiako Aquariumek, Gaztetxulo aldizkariak, Miramongo Zientzia Museoak, Kukuxumusuk eta Karpin Abenturak eskainitako sariak jaso dituzte: museoetarako sarrerak, koadernoak, kamisetak, DVDak