Euskara ikasleen I. Topagune Birtuala

Zer da Euskara-ikasleen Topagune Birtuala?

Euskararen ikaskuntza eta erabilera teknologia berriekin uztartu nahi dituen egitasmoa da Topagune Birtuala. SUEren plataforma telematikoan www.santurtzieus.com burutuko da eta bertan hainbat jarduera, tailer, foro, txat-saio... izango dira euskara ikasten ari diren eta ikasitakoa erabili egin nahi duten guztien esku.

Zertarako da Euskara-ikasleen Topagune Birtuala?

Topagunea ikasgelatik kanpo gertatzen den ikaskuntza bultzatzera dator, partaideen arteko lankidetza sustatuz eta sare sozialak sortuz. Azken batean, nahi duten guztiei euskararen erabilerarako aukerak eskaini nahi dizkiegu, era ludiko eta atseginean.

Horrekin batera, jakina, Informaziorako eta Komunikaziorako Teknologiak euskararen ikas-prozesuan integratzeko ahalegina egin nahi dugu, gure inguruko hizkuntzen ikaskuntzan gertatzen ari denaren ildo beretik. Bestela esateko, Internet euskara ikasteko eta erabiltzeko tresna baliagarria izaten lagundu nahi dugu.

Nolakoa da Euskara-ikasleen Topagune Birtuala?

Topagune Birtualean hainbat eta hainbat jarduera eta tailer burutuko dira. Horietako batzuk iraunkorrak izango dira eta Topagune osoan zehar izango dira martxan. Beste asko, ordea, iraupen laburragokoak dira eta Topagunearen bi aldietako batean zehar burutuko dira. Hona hemen aldiak eta jarduerak:

Jarduerak

Jarduera iraunkorrak: apirilaren 27tik ekainaren 1era

• Idazlanen lehiaketa
• Eztabaida-gunea
• Amaitu dut. Eta orain zer? Euskara-laguna
• Irratia entzuten

Lehen aldiko jarduerak: maiatzaren 3tik 11ra

• Euskara ikasteko tresnak interneten
• Kantuak
• Zein liburu irakurri duzu?
• ¿Qué puedo hacer para aprender? Técnicas y estrategias

Bigarren aldiko jarduerak: maiatzaren 12tik ekainaren 1era

• EGA lortu nahi dut
• Inkesta: nola ikasten duzu zuk?
• Pertsonaia ezkutua
• Hitzen tailerra

Aipatu jarduerak Santurtziko Udal Euskaltegiko irakasleek gidatuko dituzte.

Izen-ematea

Topagune Birtualean parte hartzea doakoa da, baina komeni da matrikula egitea. Horretarako argibideak www.santurtzieus.com webgunean azaltzen dira, 944 61 02 15 telefonoan, edo ondoko helbide elektronikoan: admin@santurtzieus.com