Teknologia albisteak

CIVE 2005 kongresu birtuala

Iñaki Murua - HABE

2005-03-07 : 09:03

Otsailaren 7tik 27ra CIVE 2005 kongresua burutu da. Bilera zientifiko honek duen ezaugarri nagusia komunikabidea da, bitartekoa Internet baita (foroak, e-posta, txat saioak). Hezkuntzaren inguruko 388 ponentzia aurkeztu dira (8 EAEtik igorrita), 29 gai-esparrutan sailkatuta, eta 11 tailer antolatu.

Partaideen artean, HUZEZIko eta EHUko kideak, besteak beste. HABE ere tartean izan da, irakasleen prestakuntzan txataren erabilerari buruzko ekarpen batekin. Aipagarria, bestalde, blogak hamaika aldiz agertu izana CIVE 2005 kongresuan.

Inpresioa, ohiko kongresuetan bezalakoxea: era guztietako ekarpenak eta interesgarriena harreman pertsonalak; azken baten, ziberespazioan, ordenagailuen atzean pertsonak daude. Beste ondorio bat: bertan partaide, ponente zein moderatzaile gisa aritzen ikasi beharra dagoela; aurrez aurreko ohiturak egokitzea edota estilo eta estrategia berriak baliatzea ezinbestekoa da eraginkor eta eroso jarduteko.