Iritsi da Ikea fenomenoa
Gaur zabalduko dute Barakaldoko Ikea denda, goizeko 10:00etan. Irekiera horretarako egin duten publizitate kanpainarekin batera, webgune bat ere egin dute: www.llegaelfenomenoikea.com. Lehen asteko eskaintza berezien berri, autobusei buruzko informazioa eta beste hainbat atal eskaintzen ditu webguneak, beti ere gaztelania hutsean.
Berria-n joan den astean argitaratu zuten moduan, Euskara garesti dago Ikean. Baita www.llegaelfenomenoikea.com webgunean ere.
Ikusmina eta protestak
Jendetza espero dute Megaparken egunotan eta horretarako jarri dituzte autobus bereziak Barakaldo eta Bilbotik. Dendak 16.000 metro koadro dauzka guztira eta 8.500 altzari, etxeko tresna eta apaingarri baino gehiago egongo dira salgai. Gainera, haurrentzako jolastokia, kafetegia eta bestelako atseden guneak eraiki dituzte.
ELAk, LABek eta CCOOk Ikeak jai egunetan ere zabaltzea erabaki duelako protesta egingo dute. Bestalde, Ikearen saltokiak Ezkerraldeko egoera ekonomikoa eta langileen baldintzak kaskartuko dituelakoan dira sindikatuak eta SOS Ezkerraldea. Hori dela-eta, elkarretaratzeak egingo dituzte gaur.
Erantzunak
Dena den nazkatzen hasita nago. Azken finean, Irratian (Radio Euskadi, etab.) egun osoa lata ematen ari badira, hemen ere ditxosozko fenomenoa agertzen bada, eta lehendakaria bera hara joan bada ze liluragarriak diren esatera, ez ote gara doako publizitatea egiten ariko?
Fenomenoa? Geu ari gara fenomenoa ezerezetik asmatzen euren probetxurako! (Eta akaso gure kalterako, batek daki).
www.ikea.es webgunean Ikeak Estatuan dituen denda guztien informazioa ematen dute, eta hara! Kataluniako dendei buruzkoa katalanez ere badago! Barakaldoko dendari buruzkoa gaztelaniaz bakarrik irakur daiteke ordea. Dirudienez Ikearen arduradunei ez zaie iruditu euskararen erabilerak eraginik izango duenik euskaldunen artean denda horrek duen irudian, are gutxiago salmenta kopuruetan (eta zoritxarrez arrazoi izango dute seguruenik. Noiz arte?). Horrelakoen aurrean ezer esan gabe gelditu ordez, Behatokian (www.behatokia.org) salaketa jartzea gelditzen zaigu behintzat herritar xumeoi!