EGM-ek Interneti buruz emandako datuak
Estudio General de Medios-ek Interneten erabilerari buruz egin duen azken galdeketaren datuak jarri ditu sarean. Galdeketa hau urria eta abendua bitartean egin da sarea erabiliz. Erantzun duten erabiltzaileak 62.918 izan dira. Galdeketak, gazteleraz, katalanez, gailegoz eta euskaraz jarri dira sarean, baina gutxi izan dira erantzun duten euskaldunak eta are gutxiago euskaraz egin dutenak. 2.335 erantzun jaso dira EAEtik eta 767 Nafarroatik. Euskaraz 405 soilik.
Galdeketa honen emaitzak ezagutu nahi dituenak www.aimc.es webgunean aurkituko ditu. Hona hemen hainbat aipagarri.
Ordenagailu eta Interneten erabiltzailea
Galdeketan honek erabilerari buruzko datuak ematen dizkigu lehenik: Ordenagailuen erabiltzaileen portzentajea %41,6ean dago Espainian. Azken hilabetean Internet erabili dutenena %32,9.
Gehienek etxetik edo lanetik sartzen dira Internetera. Etxetik egunero edo ia egunero sartzen direnak %74,5 dira lanetik berriz, %53,3.
Erabiltzailearen ezaugarriak
Gizonezkoa eta 25-34 urte bitartekoa da. Langilea eta ikasketa unibertsitarioduna (Batxilergoa edo LH dutenen kopurua ere garrantzitsua da). Ezkongabeak %55,8a.
Blogak, webguneak eta sinadura elektronikoa
Orain puntan dagoen blogaren fenomenoa nahiko hedatua dago itxura denez. %10,6ak dio blog bat duela, nahiz eta sarri eguneratzen dutenen portzentajea %3koa izan.
Webgune pertsonala dutela diotenak %21,7 dira. Beti ere, galdeketari erantzun diotenen artean.
Sinadura elektronikoko ziurtagiri digitala berriz, % 20,1ak.
Datu hauek guztiak eta gehiago, goian aipatutako orrian aztertu ahal izango dituzu.
Erantzun
Sartu