Ez da posible

Gehienok gara edo izan gara elkarte, erakunde, alderdi... bateko kide edo partaide. Bertan, aukera izaten dugu zuzendaritzak, ordezkariak, bazkide berriak ... hautatzeko eta, nire esperientzia pertsonalean behinik behin, inori ez zaio bururatu barruko kide den multzo bat kanpoan uztea aukeraketa horietan. Normalean horrela izan ohi da. Ezin genezake imagina, adibidez, Osasuna futbol taldeko Presidentea hautatzeko bazkide talde bat hautaketa horretatik kanpo geratzea, ELAko militante talde bat bere Zuzendaritza karguak erabakitzeko garaian ez onartzea edota Gaztelubide elkarte gastronomikoan Urteko Batzarrean norbait baztertzea.

Beraz, datozen hauteskundeetan gizarte multzo bat bozketa eremutik kanpo uztea, gainerako kasuen larritasun bera du baina gizarte osora zabalduta. Ez da posible zergak ordaintzeko garaian denok berdinak izatea edota gobernutik hartzen diren erabakiekin zintzo-zintzo jokatzeko eskatzea, gero eskubideak bermatzeko garaian mugak ezartzen badira. Edo bata edo bestea.

Kontuak horrela, gizartean pairatzen ditugun beste injustizia-mota batzuekin pareka daiteke honakoa hau: etorkinen babes eza, homosexualen eskubideen aitortza...e.a. Gizarte normalizatu bat eraiki nahi badugu guztiok egon behar dugu, eta guztion ardura da horretarako baldintzak sortzea eta bidegabeak izan daitezkeen hauteskundeak saihestea.