Teknologia albisteak
4

Uztarria.com-ek jaso du 2005eko Sareko Argia saria

Erabiltzailearen aurpegia
Sustatu
2005-01-28 : 17:01

Gaur, hilak 28, arratsaldeko 16:00etan banatu dituzte 2005eko Argia Sariak, Lasarte-Oriako Txitxardin Beltxa jatetxean. Ohi bezala, prentsa idatzia, irratia, telebista, Internet eta merezimenduzko sariak eman dituzte. Interneten atalari dagokion Argia saria Azpeitiko Uztarria.com webguneari eman diote. Sareko Argian argitaratu berri dituzte saridunak.

  • Sarea: Uztarria.com
  • Prentsa idatzia: Iñigo Aranbarri (Berria-n Hizlandia saila egiten du).
  • Irratia: Mikel Bujanda (Euskalerria Irratia).
  • Telebista: Julian Iantzi.
  • Merezimenduzko saria: Gorringo taldea Kutsidazu bidea Ixabel antzezlanagatik.
  • Publizitateko saria hutsik geratu da.

Sustatuk ere jaso zuen Interneteko Argia Saria 2003an. Aurreko edizioetako irabazleak dituzue hemen: www.argia.com/argiasariak

Sari banaketa ekitaldiko argazkiak 18:00ak aldean jarriko dituzte Argiaren webgunean.

Erantzunak

Sustatu
2005-01-28 : 18:19

Sareko Argia saria: <a href="http://UZTARRIA.COM">UZTARRIA.COM</a>


Sareko Argia saria: UZTARRIA.COM


Saria ematen: Eli Pombo - Sareko Argiaren arduraduna


"Aurtengoa blogen urtea izan da eta aitortu beharra daukagu
hainbat euskal internautak lan ugari egin duela. Segur aski batek
baino gehiagok mereziko luke saria.Baina aurtengoan herri mailako
web gune dinamiko bat nabarmendu nahi izan dugu.
Herriko informazio eskaintza ugari eta erabilgarria eskaintzeaz
gain, herriko bizitza sozialaren kezkak eta eztabaidak jasotzen eta
eragiten asmatu dutelako.Hala, beren foroan gutxitan bezalako
eztabaidak, aniztasuna eta ekarpenak aurkitu daitezke.
Herriko informazioa sareko mentalitatez, begiz eta
antolamenduz islatzen asmatu dutelako, aurtengo Sareko Argia saria,
UZTARRIA.COM atariarentzat izango da."


Prentsa : Iñigo Aranbarri, "Hizlandia" Sailarengatik.


Saria ematen: Mikel Asurmendi - Argiako erredakzioko kidea


"Irudi batek mila hitzek baino gehiago balio duela entzun izan
dugu maiz. Eta maiz hala izango da. Baina askotan, gehienetan, hitz
batek, mila irudi desitxuratu eta errealitate asko ezkuta ditzake.
Hitzek, erabiltzen ditugun hitzek, egiten gaituzte eta beren esanahira
egokitzen dute errealitatea.
Euskarazko prentsaren errealitatetik abiatuta, eta etxe barruko
eta kanpoko hautsak harrotzea xede, formatu berritzailea eskaintzen
digu igandero BERRIA Egunkariak. Sail zirikatzailea, deserosoa bezain
atsegina, zuzena bezain egokia..."


Telebista: Julian Iantzi


Saria ematen: Estitxu Eizagirre - Argiako erredakzioko kidea


"Estilo eta tankera oso desberdinetako programetan ikusi
dugu, eta denetan jakin du egoki moldatzen. Plato barruan nahiz
kanpoko grabazioetan eroso mugitu da. Lehiaketetan, jakin du
lehiakideak bideratzen eta dokumentaletan gida interesgarri bihurtu
zaigu.
Ikusleak, aldamenean sentitzen duen aurkezle gutxi horietako
bat da. Etxekoa, gertukoa, naturala....."


Irratia: Mikel Bujanda


Saria ematen: Izaskun Jauregi - Argiako erredakzioko kidea


"Gaur sarituko dugun pertsonak badaki zer den bitarteko
gutxirekin lan egitea .Egia esan, uste dugu, bitarteko askorekin lan
egitea zer den oraindik ez dakiela, nahiz eta urte batzuk daramatzan
ofizio honetan.
Egunero eskaintzen dituen albisteak, berak landutako
informazioaz aberasten ditu. Bitarteko eskasiak ez baitio eragotzi,
informazio erreferente desberdindu bat lortzea. Urtetan ondutako
estilo pertsonala du informazioa eskaintzerakoan, kafesnea bezain
beharrezkoa Iruñerriko eta Nafarroako euskaldun eta euskaltzale
askorentzat."


Merezimenduzko saria: Gorringo Taldea


Saria ematen: Katixa Garate - Argiako erredakzioko kidea


"ARGIA SARIAK komunikazio Sariak dira, eta urtero, Telebista,
Irratia, Prentsa, Publizitatea eta Internet ataletako sariak banatzen
ditugu.
Komunikazioak ordea, bizitzaren eta kulturaren esparru
gehiago ere hartzen ditu. Eta iruditu zaigu, gaur saritu nahi dugun
talde honek euskaldungo osoa bere sareetan harrapatzea lortu duela.
Ez da bide bakarra noski, baina bide bat bahintzat erakutsi dute.
Jende askorengana iritsi dira. Askorengana. Eta beraiengandik
hurbil ibili diren guztiak gainera pozik utzi dituzte. Euskaldunak algara
batean elkartu gaituzte".


goiena.net
2005-01-28 : 18:50

Zorionak Uztarriko lagunei goiena.net egiten dugunon partetik. Merezitakoa da saria, bai horixe. Segi horrelaxe.

maite toledo
2005-01-29 : 13:58

Argia sariek ez didate arreta berezirik piztu izan, baina sarituen artean aurpegi ezaguna ikusi dudanean ikaragarri poztu naiz. Dotore atera zara gaurko egunkarietan Iñigo. Bejondeizula! Saria jaso duzuen beste denoi ere bai.



Irakurtzen nuen Zorroztarria eta irakurtzen dut Hizlandia. Aitortuko dut, formatoari dagokionez, luze samarra egiten zaidala batzuetan Hizlandia. Baina esan beharra daukat, bai lehen, eta bai orain, idazkera freskoa darabilela maisu Iñigok. Eta ekarpen oparoa egiten diola literaturatik kazetaritzari. Irakurleek hori, eskertu egiten dutelakoan nago. Nik behintzat bai. Hermetikoa edo laborategikoa ematen duen idazkerarik ez du erabiltzen. Berbak eta esamoldeak sarritan berak asmatutakoak edo Urola aldeko bazterretakoak ote diren pentsatzen geratzen naiz. Irribarrea eta algara ere eragiten didate takian-potian. Barregura gutxiko gaia garatzen dituenean ere hunkitu egiten naiz zenbaitetan.Grazia dauka.



Larrabetzuko Literatura Eskolan lezio magistralak jasotzen ditugu Iñigorengandik. Eta hango kide izateko suertea dut.



maite

gaztelumendi.org
2005-02-01 : 11:40

Gotzon Barandiaran idazleak Sarien argia artikulua idatzi berri du gaztelumendi.org gunean.


Argia sariak hizpide, Telebistako saria zelan Julian Iantziri eman dioten, bart telebistan ikusitakoaren kronika laburra da Barandiaranena.


Frontoian pilotan aritu ostean, "Irakeko tortura saioa" iruditu bide zaio. Irakurri ostean, zure iritzia gehitu dezakezu. Hemen (sustatun) zein han (gaztelumendi.org gunean).


Erantzun

Twitter ikonoa  Facebook ikonoa  Sartu