Sorgintxulo gaztetxea hustu du Ertzaintzak
Gaur, goizeko 9:30ean Bilboko Santutxu auzoko Sorgintxulo gaztetxean Ertzaintza eta Bilboko Udaltzaingoa sartu dira. Sei lagunek gaztetxean pasatu dute gaua, eta haietako bost lanera joan direnean sartu dira poliziak, barruan pertsona bakar bat zegoela. Hack_lab sortu berria, informatika gela, liburutegia... amets asko itxi dituzte, kolpean.
Teilatutik (garabi bat erabiliz), eta barrutik ireki dute atea poliziek. Barruan zegoen gaztea identifikatu egin du Ertzaintzak, eta 10:30ak aldera utzi diote ateratzen. Atxiloketarik ez da egon. Gaur, 20:00etan manifestazioa deitu dute Sorgintxulo gaztetxekoek.
Une honetan, Karmelo eraikina (Sorgintxulo gaztetxea eta eliza) erabat inguratuta dauzkate ertzainek eta udaltzainek. Karmelo kalea eta plaza Ertzaintzak "erabat hartuta" ditu. Jende mordoa biltzen ari da Karmelo plazan.
Bilbo inguruko bi irratitan ari dira zuzenean:
Erantzunak
Santutxuko Bertso Eskolakook, EHko zaharrenetakoa, kalean utzi gaituzte. Domekako Bizkaiko finalerako eskolakide baten azken entrenamendua zapuztu digute. Pertsonalki dagokiguna da. Sorgintxulotik dagokigun gure ale txikia.
Berdin beste talde eta ekimenekin. Kalera bota eta kitto. Sorgintxulo dagoen lokaletan sortu ziren Santutxun euskararen alde egindako kontu gehienak: Gaztedi dantza taldea, ikastola, gau-eskolak. Ia hogei urte itxita egon ostean duela sei okupatu zuten. Txukundu. Atondu. Hiruzpalau zinema izan zituen auzoan ez zen zine-aretorik gelditzen jadanik. Umeentzako euskarazko filmak eman izan dira ahal izan den artean. Eta beste hainbeste ekimen.
Azkena, bertso-rastafaria, lehengo barikuan. Orain itxi egin digute. Beharginak ari dira xaflak eta harriak jartzen, inor sar ez dadin. Bazuten gaztetxea laguntzeko lanak egiterik, etxeko egitura hobetzerik. Baina ez, ixten ari dira. Zaharrentzako egoitza zabaltzeko, gaztetxea itxi. Eurek aitortzen dute ahapeka, ezinezkoa dela zaharrentzako egoitzarik egiterik horrelako eraikin zaharrean. Badakite aitzakia hutsa dena, horren eskailera estu eta pasabideekin ez dagoela adineko jendearentzako gutxieneko baldintzarik. Baina berdin du. Gutxienekoa da itxi ostean zer egin. ixtea da garrantzitsuena. Ba omen dago alternatibarik, Txurdinagako auzo-etxea aski ei da. Horren gezurrak bazterrean utzita, gauza bat argi dago: euren eskema estuetan beharrezko da kultur etxe moduko bat. Bat eta bakarra. Pentsaezina zaie kulturarako etxe bi izatea baten bikoitza denik, proposamen bikoitza, ikuspuntu bikoitza, askoz aberatsagoa izan daitekeela. Eskuetatik ihes egiten die eta ezin onartu. Gauza asko dauzka/zeuzkan Sorgintxulok. Ez zen munduko gaztetxe onena, hala ere. Egindakoak asko izanagatik, ziur gehiago ere egin zitekeela. Irudimen apur bat, lanerako gogoa eta borondatea behar ziren. Baina irudimenaren hiltzaileek, grisaren indar armatuek, ez dute ulertzen. Eurek dute boterea. Karmelo plaza okupatu dute. Ez hasi aitzakia merkean, kalean lasai ibiltzeko eskubidea eragozten ari dela edo antzekoekin. Ez da ezer ulertzeko prestatutako makina. Aginduak bete baino ez ditu egiten, kosta ahala kosta, bete ere.
Lema asko oihukatu dira gaur. Bere xinplean bat hautatu dut: kultura gehiago, polizia gutxiago.
Eguerdian ehundaka gaztek manifestazioa egin dute Santutxu auzoan zehar. Auzoko kaleak zeharkatu dituzte "Sorgintxulo aurrera!" eta "Gaztetxetik, ez dira pasako" oihukatuz.
Eguerdiko ordubata baino lehentxeago polizia gazteen aurka oldartu da. Hala bedi irratian zuzenean bizi izan dute oldartze hori.
Bitartean, poliziaren okupazioak bere horretan dirau eta langileak gaztetxea ixten ari dira.
Iluntzean ere manifestazioa
Gaur iluntzean bertan manifestazioa izango da Santutxun, 20:00etan. Gainera, astebururako Bilbon manifestazio handi bat egiten saiatuko dira Sorgintxulo gaztetxearen alde.
Santutxuko berri Internet bidez euki dugu. Telefono deiak ere jaso ditugu, zelan ez.
SMSak bero bero dabiltza Bilbo eta inguruetan ere.
Irola irratia Internet bidez ere emititzen ari da.
Indymedia eta Gaztesareak ere informazio jario etengabea daukate.
IRC kanaletan ere lanean dagoen jendea antolatzen ari da. Auzolan telematikoa
Santutxuko Sorgintxulo gaztetxea kultur gune eta jakintza gune ikaragarria da. Horregatik ikaratu da boterea.
Hack lab berri bat. Informatika gela. Liburutegia. Auzoko zinema bakarra. Zergaitik hustu dute bada?