On-line komertzio webguneek ez dituzte arau guztiak betetzen

Betebeharrak

Eusko Jaurlaritzako Kontsumo Zuzendaritzak informatika eta elektronika produktuak saltzen dituzten 45 webgune komertzial aztertu ditu. Kontsumo Zuzendaritzak gogorarazi du Internet bidez erosten denean, eskaintzak eroslearen interesak babestuko dituen zenbait datu derrigorrez izan behar dituela. Hona adibide batzuk:

• Hornitzailearen identitatea.
• Produktuaren ezaugarriak.
• Produktuaren prezioa.
• Garraio kostua.
• Ordainketa modua.
• Banaketa modua.
• Eskaintzaren baliozkotasun epea.

Aldi berean, egiaztatu behar da erosleak kontratazioaren gaineko baldintza orokorrak eskuragarri dituen. Gomendatzen da formularioa zehatz mehatz irakurtzea eta erosketaren dokumentuak gordetzea erreklamazio posibleetarako.

Kontsumo Zuzendaritzaren arabera, aztertutako webguneek:

• Zuzenki informatzen dute hornitzailearen identitatearen gainean.
• Eskaintzen dituzten produktuen deskribapen egokiak egiten dituzte
• Ordainketa moduen gaineko informazio osatua ematen dute, baita zerga eta garraio gastuen gainean.

Gabeziak

• Aztertutako webguneen %73ak eskaera egiteko erosleak jarraitu beharreko tramiteak azaltzen dituzte. Baina, kontrako aldean, erdiak ere ez du azaltzen erositakoa itzultzeko dagoen epea.

• Webgune gehienek ez dute garbi azaltzen eskaintzak irauten duen epea.
• Datuak sartzerakoan erosleak izan ditzakeen akatsak identifikatzeko eta zuzentzeko baliabide teknikoen berri ez du webgune batek ere.
• Webguneek ez dute adierazten kontratua zein hizkuntza posibleetan sinatu daitekeen.
• Kontratua formalizatzen duen mezu elektronikoa nonbaiten artxibatuko den ez dute azaltzen webguneek.

Eusko Jaurlaritzako Kontsumo Zuzendaritzak kontsumitzaile eta erabiltzaileei gomendatu die Internet bidezko erosketen gaineko eskubide eta baldintzak ezagutu ditzaten; lege babes guztiak izateko.