John Peel hil da, britainiar disc-jockey beteranoa
BBCko eskarmentu handiko disc-jockeya astelehean hil zen. Peel-ek mota guztietako taldeen musika helarazi zuen urte askoan, Ramones eta Smiths taldeena kasu. Perun oporretan zegoela hil zen bihotzekoak jota, 65 urterekin.
BBC Radio 1eko disc-jockey beteranoena zen John Peel. 1967 hasi zen bertan lanean eta "Top gear" izeneko gabeko programarekin egin zen ospetsu. Punka, reggae eta hip-hop musikari ateak zabaldu zizkion. Entzule pila zituen. BBCk hil osteko omenaldi moduan, "Teenage kicks" eta "Undertones" abestiak aireratu zituen; aipatu azken abesti hori zen Peel-en abesti gustukoena. Peel-en benetako izena John Robert Parker Ravenscoft zen eta 1939 urtean jaio zen.
John Peel sessions
Bere lanen artean, oso ezagunak dira John Peel sessions saioak. BBCko estudioetan egindako zuzeneko grabazioak ziren eta bertatik ehunka talde pasatu ziren: Jimi Hendrix, The White Stripes, Joy Division, T. Rex, The Smiths, Pixies, The Fall eta The Wedding Present, besteak beste. Denborarekin saio horiek musika artxibo baliotsua osatu dute, musika modernoaren ibilbidea adierazten dute.
Erantzunak
Duela ia 20 urte, eduki nuen The Smiths-en lehen diskoa, Hatful of Hollow, BBC-ko Peel-en sesioetakoa ei zan... Asko markatu ninduen musika hark.
Izenak bere bidea egin du; Euskal Herrian, Metak disketxeak azpi-zigilu bat ere badu: Pil-Pil sessions
Split 77 taldea orain dela urte bete inguru Eskoziako Aberdeen hirian burutu zen "Go North" jaialdian izan zen. Bertan europako musika industriako hainbat lagun garrantzitsu izan ziren. Londres-eko "Music Week" aldizkariko jendeari taldea gustatu zitzaion eta honekin bere hilereko alean artikulu bat idatzi zuten eta baita hilabetero ateratzen duten disko bilduman Split 77 taldearen "Antenna" diskoko "Malkoa" kantua sartu ere.
Honen ondoren, Peel Sessions zirelakoan egiteko mintzamenetan ibili ziren, guztiz interesatuta BBC Irratiko jendea. Taldearen sonoridadea, itxura eta jarrera gustoko zituzten eta beraiekin lan egiteko prest azaldu ziren.
Azaroan taldeak beren bigarrengo diskoa plazaratuko du, "Mentura" deituko dena. Bertako jendearekin harremanetan jarrita badago aukera bat udaberrian edo kontzertu bira bat egiteko.
Orain, iada Peel ez dago.
Ingalaterrako musikak gizon garrantzitsu bat galdu du.
Berria Sustatura bidaltzekotan nengoen, baina Euskal Herrian horren ezaguna ez zelakoan azkenean ez dut bidali.
Sekulako galera de musikarentzat orokorrean eta Britainia Handikoarentzat bereiziki. Azken 30 urtetako Britainia Handiko musika ezin uler daiteke bera gabe. John Peel izan da urteak joan eta urteak etorri talde berrien musika uhinetan jartzen zuena. Astero-astero ehunka grabazio jasotzen zituen talde hasiberriek (eta ez hain hasiberriek) bidalita. Eta ziur nago gehientsuenak entzuten zituela, aurreiritzirik gabe.
Nire Britainia Handiko lagunak benetan goibeldurik daude, egia da oso musikazaleak direla, ez dakit hain zaleak ez direnak horrenbeste penatuta ote dauden. BBCko arduradunek lan benetan zaila izango dute bera ordezkatzen.
Galdera bat sustatuzaleei: ba al dakizue euskal talderik Peel Session horietako bat grabatzera joateko gonbitea jaso ote zuen? Estatuko talde batzuk egonak dira sesioa grabatzen, ez oso aspaldi.