Debagoieneko I. Musika Lehiaketako lehenengo kontzertua ostiralean
"Danbaka" antolatu du Goiena multimedia enpresak Elgetako Espaloia Kafe Antzokiarekin batera. Debagoieneko 43 talde aurkeztu dira lehiaketara eta epaimahaiak 20 aukeratu ditu lehiaketan parte hartzeko. Ostiralean, hilak 22, hasiko dituzte zuzeneko emanaldiak taldeek. Lehiaketako irabazlearentzako saria izango da disko bat grabatzea.
Epaimahaikoek zuzeneko saioak baloratuko dituzte. Lehenengo kontzertua izango da hilaren 22an, Espaloia Kafe Antzokian (bost emanaldi eta finalekoa) 22:30ean. Lehenengo kontzertuan lau talde hauek joko dute:
- Potemkin (Oñati)
- Jim TNT (Arrasate)
- Matxura (Elgeta-Soraluze)
- Amonal (Oñati)
Hurrengo emanaldiak azaroaren 5ean eta 19an eta abenduaren 3an eta 17an izango dira. Finala urtarrilaren 14an izango da.
Sari nagusia, disko bat grabatzea
Danbaka lehiaketak bi sari izango ditu: lehenengoa, lehiaketako epaimahaiak emango duena, diskoa grabatzea. Beste bat ere egongo da: bateria bat eta 1.000 euroko erosketa bonua, Gasteizko Carrion dendan musika instrumentuetan gastatzeko. Sari hori ikus-entzuleek emango dute SMS mezuak bidalita.
Kontzertuetarako sarrerak Espaloian edo Gaztekutxan
- Kontzertu bakoitzeko: euro 1 (Gaztekutxan) eta 3 euro (Espaloian).
- 6 kontzerturako abonua: 6 euro (Gaztekutxan) eta 15 euro (Espaloian).
www.gaztekutxa.net webgunean erosi daitezke sarrerak.
Taldeen berri Goiena.net-en
Lehiaketan parte hartuko duten 20 taldeen informazio osoa eta lehiaketaren gaineko beste hainbat informazio dago Goiena.net-en, Debagoieneko atarian.
aspalditik ari naiz Danbaka lehiaketa jarraitzen. Goiena.net gunean iragarri zutenetik, begiz jo eta jarraitzen dihardut.
Bide batez, irakurri ditut ere, edozein lehiaketak sortzen duen polemika ere... gustatu zait. Zaleak, lagunak izaten dira lehiaketa bateko txarrenak, umeen futbito txapelketetako gurasoen antza hartu diet askori... pikoi hutsak.
Baina gaur, goiena.net nire disko kutxa bihurtu da, kantu mordo bat entzun ditut, Arrasate eta inguruetako Oi! musika hori, lehen kitarra akordeekin burua Arrasateko gaztetxe zaharrera joan zait. Oi! Oi!
Bergara, Oñati... herri ezberdinetatik ibili naiz. Talde ezberdinak ezagutu ditut, Elgeta eta Soraluzen Bide Ertzean taldearen jarraitzaileen taldeak (Matxura ), bakarlariak (Izas ) entzun ditut.
Ideia oso ona iruditu zait. Astinduko ditu horrek, telebista, astelehenetako egunkaria, goiena.net bera, Elgetako Espaloia kafe antzokia, bertako taldeak, jarraitzaileak, musika bera -horrek ere astinaldi ederra behar duelako-.
Atzean daudenak ikusita, Iker, Iban, Shot... ba poztekoa da, inguruan ibilitakoak dira beti. Eta hoiengatik ere poztu naiz, gustuko saltsan ibiliko direlako.
Besterik ez, nik Internetetik jarraituko dut lehiaketa bera, eta ea jendeak asko gozatzen duen.