CDak kopiatzeko makinen zerbitzua Bilbon
Copyplay enpresak Bilbon zabaldu du denda. Bertan zeregin ezberdinetarako makinak daude: CDak kopiatzeko, bideo edo binilozko diskoak CD eta DVDan gordetzeko eta argazki digitalak inprimatzeko. Aldi berean, bideokluben antzera, filmak alokatzeko makina ere bada denda honetan.
Funtzionamendua
Makina hauen funtzionamendua erraza da. Bezeroak euro bat sartzen du txanpona sartzeko zirrikituan. Aldi berean, kopiatu nahi duen CDa sartzen du makinan. Orduan, aparatuak erabili gabeko CD bat jartzen du. Horrela, CD originaleko edukia grabatzen hasten da. Binilozko diskoen eta VHS filmen kasuan, prozesua motelagoa da, eta horregatik, orduka ordaintzen da.
Copyplay-k baditu Espainiako estatuan hainbat denda: Valentzian, Sevillan, Zaragozan eta Kordoban. Eta aurrera begira, gehiago zabaltzeko asmoa du.
YourMusic
Orain gutxi sektore bereko beste enpresa baten berri eman genuen Sustatun: YourMusic. Azken honek ere, Bilbon denda bat zabaltzeko asmoa du. YourMusic-ek sistema berri bat garatu du. Horren bitartez, bezeroak nahi duen abestiekin osatu dezake Cd-a; ordenagailua eta Internet eskura izan gabe.
Erantzunak
YourMusic-en kasuan, zerbitzua martxan jartzerakoan, kontuan izan dituzte autore eskubideak; sistema edo programak duen funtzio baten bidez, badakite zehazki zenbat aldiz saltzen den abesti bakoitza. SGAE-ko produktore fonografikoen erregistroan barneratu da "YourMusic" proiektua. Horrela, duen musika bilduma saltzeko beharrezko diren lizentzia eta baimen guztiak ditu. Saltzen dituen abesti bakoitzeko autore eta bestelako eskubide guztiak ordainduko ditu.
Musika CDa bezeroak aukeratutako abestiekin
Bilbon non dago? Euren web orrian oraindik ez dute jarri Bilboko dendaren helbidea.