Jamaikak jakinmina piztu du

Irailaren 6an Sustatuk sail berria iragarri zuen: Jamaika Ikusteko Jaio Gara. Sail berria oinarritua dago del.icio.us zerbitzuan, eta aukera eskaintzen digu Sustatuko erabiltzaileoi sarean aurkitzen ditugun irakurgai interesgarriak irakurle guztion artean partekatzeko.

Ikusten denez, jendeak harrapatu du Jamaikaren helburua, eta hasi da materiala bidaltzen: lehen astean 65 erreferentzia bidali dira.

Gairik erabilienak

Sailkatzen hasiz gero, hogeita zazpi bat ataletan banatuko genituzke 65 erreferentzia horiek, denetaz dihardute-eta. Hala ere, egin daiteke sailkapen txiki bat, eta horren arabera, hauek dira gairik erabilienak:

1. Blogak: 13 erreferentzia.
2. Internet: 8.
3. Umorea: 6.
4. Webguneak: 4.
5. Osasuna: 3.

Horien ondoren beste hainbat atal datoz: kirola, argazkigintza, kazetaritza, zinema, gertakizunak, etab. Ikusten da, beraz, oraingoz gairik erabilienek badutela zerikusirik Internet eta beronen kontuekin (blogak eta webguneak). Jende gehiago sartu ahala, baina, gaiak zabalduz joango dira.

Hiru pertsona ezagun ere agertzen dira erreferentzia horietan: Anjel Lertxundi bitan agertzen da, Bernardo Atxaga batean, eta Hendrike Knorr beste batean.

Jamaikarrak

Eta zenbat jende sartu da Jamaikan? Zaila da hori jakitea zehatz-mehatz, webguneak neurtzen baititu zenbat hit egin diren sail berrian, hau da, jendeak zenbat aldiz egin duen klik hor sartzeko. Horren arabera, badakigu aste horretan 542 hit izan dituela sail berriak.

Jendea hasi da Jamaikan sartzen, eta hor dagoen materiala ikuskatzen. Ulertzekoa denez, askok oraindik denbora beharko dute hor sartu, ikusi eta gauzak ulertzen hasteko. Eta, jakina, erabiltzen. Guk horixe nahiko genuke: gero eta jende gehiagok erabiltzea sail hori, ahalik eta material gehien partekatzeko denon artean.