iMac G5 ordenagailua aurkeztu da
Applek iMac G5 ordenagailua aurkeztu du Parisen, Apple Expo erakusketaren barruan. Teklatua izan ezik, ordenagailuaren elementu guztiak LCD pantaila batean sartzen dira.
Gaur goizean Phil Schiller Apple enpresako lehendakariordeak erakutsi du iMac G5 ordenagailu berria. Parisen izan da, Apple Expo erakusketan. Hedabideek berehala harrotu dute gaia sarean.
Monitorea da ordenagailua
Betiko moduan, ordenagailuaren diseinuak ematen du atentzioa. Izan ere, sistemaren elementu guztiak LCD pantaila batean sartzen dira. Applek bi pantaila aurkeztu ditu: 17 eta 20 ontzakoak. Eta hor sartzen dira plaka logikoa, bozgorailu estereoak, disko gogorra 80 edo 160 GBkoa, Combo unitatea edo SuperDrive kargazkoa eta baita elikatze unitatea ere. Prezioa: 1.369 eurotik hasita.
G5 prozesagailuari esker, Applek jartzen du etxeko erabiltzailearen esku orain arte profesionalen pribilegioa zena: goi mailako ordenagailua. Honek dakar instalaturik Mac OS X v10.3 sistema eragilea, AppleWorks, (idazteko programa, kalkulu orria, datu basea, marrazteko programa, taulak ) iLife (bost programarekin: GarageBand, iTunes, iPhoto, iMovie, iDVD) eta zenbait joko.
Laurogei GBko ordenagailuan gorde daitezke 6 ordu bideo, 18.000 abesti edo 48.000 argazki. 160 GBkoan, hori halako bi. Horrezaz gain, CDak graba litezke, nahasketa eta guzti, DVDak ikusi eta baita hauek grabatu ere.
Erantzunak
Niri ere diseinuak eman dit atentzioa, baina puntu oker bategatik: konexioetarako portuak pantailaren atzean daude; baina, leku sobera badago ere, berriro juntu-juntu jarri dituzte, askotan portu guztiak batera erabiltzea eragotziz (adibidez, USB batean pen-drive moduko zerbait sartuz gero).
Hau ez da bakarrik MACen arazoa, PC gehienek ere badute, baina ez dute beren diseinua hainbeste "saltzen".
iMacarekin datorren teklatuak USB portu bi ditu alboetan: batean sagua sartu behar da, eta bestea libre geratzen da, portua eskura behar duzunerako. ..
Dena den portuena ez dago oso pentsatuta ez, motorra saltzeko argudioetako bat zera da: ordenagailua bera lau-laua izanda, erraz asko lor daitekeela VESA estandarreko euskarri bat horman eroso-eroso eskegita uzteko... ideia ez da txarra... baina horrela jarriz gero ez dago kristorik atzeko portu horiek erabili dezakeenik...
Antza denez, iMac-en bertsio berri honetan diseinu klasikoagoa egin nahi izan dute aurrekoan baino. iMac G4ren lanpara itxura hori oso polita da, eta arreta deitzeko oso egokia, baina ausartegia omen zen, eta bezero potentzial berriak 'uxatu' egiten zituen nonbait...
Mac-zaleon kexarin handienak makinaren ekipamenduagatik izan dira: 256Mbko memoria baino ez dakar fabrikatik, eta hori gutxiegi da ganorazko ezer egiten hasteko. Baina beno, memoria handitzea ez omen da zaila. Txarrena txartel grafikoa omen da. NVIDIA GeForce FX 5200 Ultra txartela dakarte iMac G5 berriek, 64Mb-koa. Sistema eta aplikazio gehienak duintasunez mugitzeko nahikoa, bai, baina zaletu askok diote eskuzabalagoak ere izan zitezkeela horretan...
Horixe falta zaigu jakitzea balio duela burrada bat bider bi. MacEROAK...