FiloBlogia: euskal filologiaren bloga
Ricardo Gómezek "FiloBlogia" jarri du martxan, euskal filologiari buruzko weblog bat. Gomez EHUko Euskal Filologiako irakaslea da eta blog berri honetan filologia eta hizkuntzalaritzarekin lotutako gaiez aritu nahi du.
Gómezek webloga egin du, bereziki, Euskal Filologiako ikasleekin iritzi trukatze bat izateko. Nahi duena da batetik, Euskal Filologiako ikasleei beste baliabide bat eskaintzea. Baina, oro har, euskal filologian eta hizkuntzalaritzan interesa duten guztiei informazioa eta iritziak trukatzeko gune bat eskaintzea: Batzutan, filologia adituak ez direnentzat ere erakargarria izan daitekeela iruditzen zait. Zer esanik ez Euskal Herrian!! Espainian gizabanako bakoitza futbol selekzionatzailea dela esaten bada, Euskal Herrian beste horrenbeste esan genezake filologoez.
Hala, horrelako artikuluak bilduko ditu blogak:
- ikasleentzat interesgarriak izan daitezkeen berriak
- Interneteko estekak
- (euskal) hizkuntzalaritza eta filologiaren ikerketei buruzko albisteak
- liburu eta artikuluei buruzko iritziak
Euskarari buruzkoak eta beste
Artikulu motetan ez du estuegia izan nahi Gómezek : Printzipioz, (euskal) filologia eta hizkuntzalaritzarekin lotuta daudenak, eta parentesiak hor daude ez dutelako nahitaez euskarari buruzkoak izan behar. Aldiz, euskararen inguruko beste kontu batzuk (araugintza edo "euskalgintza" deitzen den hori, kasu) ez daude nire interesen artean, weblogari dagokionez behinik behin.
Kolaborazioak informatikaren menpe
Gómezenak izango dira artikulu gehienak, baina kolaborazioak izatea ere gustatuko litzaioke: Hemen arazoa da nire ezjakintasun informatikoak ezarritako muga. Doi-doi jakin izan dut weblog bat sortzen eta ereduko zati batzuk euskaratzen, ez osoa baina. Kolaborazioak jasotzea gustatuko litzaidake, baina ez dakit teknikoki nola egiten den (iruzkinez kanpo, noski). Gainera, webloga hor dago, baina ezin izango dut, noski, egunero-egunero zerbait idatzi; beraz, bestek laguntzen badu, ongi etorri!
Martxan jarri berria
Ekainaren 30ean jarri zuen martxan Gómezek FiloBlogia bloga, Hiztegia.net hiztegi bildumari buruzko artikulu batekin.
Irakasle baten bloga, serioa, euskaraz eta euskarari buruzkoa; interesgarria benetan.
Beste Webgune Euskaldun Bat: http://filoblogia.blogspot.com
Erantzunak
Euskal filologiaren inguruko bloga, serioa, euskalduna eta euskal filologiaz benetan dakien norbaiten esku... sartu dut nire Gogokoak karpetan.
Ricardo Gomez nor den eta zeintzu lan egin dituen ikusita, ez dut zalantzarik euskal filologiaren inguruko albiste eta hausnarketa ugari jasoko ditugula bertatik.
Zorionak eta animo ibilbide berri horretan.
Hortxe dago Ricardoren blog-a, euskal feed-en zerrendan gehituta:
http://www.bloglines.com/public/euskaraz
Zorionak Ricardo! Euskarari buruzko oso blog ona! Argi dago euskararen munduan murgildu zinela, berari buruz asko dakizula eta euskara bultzatu nahi duzula! Informazio interesgarria jasoko dugu hemendik eta eskertzekoa da.
Animo eta zorionak berriro ere sortutako weblogagatik!
Zorionak Ricardo blog honengatik.
Ez da ageri aukeretan non dagoen blog honen Feed-aren helbidea, baina nire feed irakurgailuaren bidez deskubritu dut http://filoblogia.blogspot.com/atom.xml
helbidean dagoela. Hortara harpidetu naiz Bloglines.com bidez, eta beraz, nik handik irakurriko dizut. Ez pentsa irakurle guztiek zure estatistika ikonotxo horren bidez kontrolatuko dituzunik... nire bisita izan gabe, zure gunetik jariatzen den XML informazioaren bidez irakurriko dizut nik.
ondo ibili
Luistxo