Teknofiloen albistegia
4

Izozmendiaren ederra!

Erabiltzailearen aurpegia
Joxe Aranzabal
2004-07-02 : 10:07

Izozmendiak ikaragarriak izan daitezke —gogoan izan izozmendi batek hondoratu zuela Titanic itsasontzia—, baina baita zoragarriak ere. Gaur azken horietako bat erakutsiko dizugu.

Denboraz larri bazabiltza, zoaz zuzenean testu honen bukaerara, klik egin argazkian (Izozmendia.jpg) eta gozatu ikuskizunaz. Izozmendi hori Atlantiko Itsasoan aurkitu zuten, Ternua inguruan, eta Global Marine Drilling enpresako eledunek adierazi dutenez, 300 milioi tona inguru pisatzen du.

Non sortzen dira izozmendiak?

Izozmendiak izotz masa ikaragarriak dira, Iparburu eta Hegoburu aldeko hormaguneetatik askatzen dira eta itsasoan ur gainean doaz. Horrelaxe dio Lur Hiztegi Entziklopedikoak.

Hegoburuan izozmendi askoz gehiago izaten da (%93) Iparburuan baino, eta handiagoak dira (8 km. luze eta 45 m. garai izan daitezke). Ur gainean ageri den izotz koskoa, ordea, izozmendiaren bederatzirena baino ez da izaten.

Iparburuko izozmendiak Groenlandian sortzen eta Ternua inguruan biltzen dira, Labrador golkoko ur lasterrak bultzaturik. Hori da argazkiko izozmendiaren kasua. Hego hemisferioan, ostera, Hegoburuko ur lasterraren hegoaldean biltzen dira gehienak.

Itsasketa galarazten dutenez, itsasontzi asko dabilen tokietan leherkariak erabiltzen dira izozmendiak puskatzeko.

Albiste honen egitura

Konturatuko zinen, irakurle, albiste hau arin horietakoa dela, garrantzi gutxikoa. Baina argazkiak merezi zuela iritzita, ausartu egin gara Sustatura ekartzera eta, horretarako, egitura berezia eman diogu: itxaron gabe albistearen bukaerara, lehen paragrafotik eman dizugu aukera argazkian klik egin zenezan, nahiz eta jakin hori eginez gero seguruenik ez zenuela gainerako guztia irakurriko. Hori egin baduzu, gu pozik, hori baita legea sare dontsu honetan.

Hala ere, horrelako argazki batek zerbait gehiago eskatzen duenez (ez baita egia irudi batek mila hitzek adina balio duela, bestela non dago Konfuzioren irudia, berari egozten baitzazio esaldi hori?), seguruenik, itzuli egingo zinen albistera, eta irakurtzen jarraitu. Eta hori egin baduzu, gu are eta poziago, gure amuak ondo egin duelako bere lana.

Erantzunak

Jabi Zabala
2004-07-02 : 13:53

Horixe da neuk egin dudana, titularra eta goiko aldea eskaneatu ditut (ez dut erreparatu behean dagoela dioen esaldian) eta argazkirako loturaren bila abiatu naiz beherantza, gehiago irakurri gabe. Beste fitxa batean zabaldu dut lotura (Explorer-en beste leiho batean izango zen) eta irudia ikusi ostean bueltatu naiz testura.



Izan ere, sareko irakurketaren ohiturak inoiz aipatu izan dira hemen. Internautak eskaneatu egiten ditu lerrook eta informaziorik inportanteenaren bila abiatzen da, oso gutxitan irakurriko du testu luze osoa. Irakurgarritasuna bilatzen duen webmasterrak hori kontutan izan beharko du.

Anonimoa
2004-07-05 : 16:45

San fotoxop izena ipini diote

Jabi Zabala - sarean.com
2004-07-06 : 12:52

Hori beste kontu bat da, baina egia da. Ur azpian argazkirik egin duen edonork badaki neurri horretako iceberg bati argazki hori ateratzea ezinezkoa dela. Googleatu dut pixkat eta hau aurkitu dut, fotomuntaketaren azalpena.


Gari Araolaza
2004-07-06 : 13:11

Zorionak Joxe!



Argazki xinple (eta eder) batekin lortu duzu eztabaida!! ;-)

Erantzun

Twitter ikonoa  Facebook ikonoa  Sartu