Irakeko .iq domeinua ez da burujabea
Gaur, ekainak 30, egin behar zuten Irakeko Gobernuaren eskualdatzea, baina iragarri baino egun batzuk lehenago egin dute. Hala ere, Bagdadeko gobernua ez da oraindik burujabea Interneten. Irakeko .iq domeinua geldi dago eta ezin du inork erabili.
Irakeko komunikabide batzordeak eta herrialdean orain arte egon den administrazio amerikarrak nahi izan zuten .iq domeinua geldi egotea, Irakeko webguneen zerrenda egin arte. Estatu Batuetako Texasen kokatuta dagoen Alani erakundearen esku dago orain .iq domeinua.
Munduan 240 lurralde daude Interneteko domeinua dutenak. Hor daude Espainiako .es, Frantziako .fr edo Britainia Handiko .uk, besteak beste. Bi letra horiek zehazten dute sarean estatu bakoitzaren lurralde birtuala. Iraki aspaldi eman zitzaion .iq domeinua, 1997an, baina momentuz ezin da erabili.
Erabiltzaile gutxi oraindik
Estatubatuarrek egindako ikerketa baten arabera, irakiarren %12ak du ordenagailua etxean. Horietatik %6ak du Interneterako sarbidea eta %2ak nabigatzen du maiztasunez. Hala ere, Bagdad eta inguruetan cyber-kafeak ugaritzen ari omen dira.
Mendebaldeko Saharak ere ez dauka bere .eh domeinua aktibatuta, Marokok okupatuta jarraitzen duenez eta, batez ere, SEAD estatua NBEk ezagutzen ez duenez, ezin izango dute erabili.
Azken finean, Internet ez da eremu librea. Letraz idaz daitezkeen domeinu izen generikoak , herrialdeen domeinu izenak eta IP helbideen banaketa ere lehen munduko trajedun gutxi batzuen esku daude.