Argazki gehiago amerikarrek eragindako torturaz
The Washington Post egunkariak argazki eta bideo gehiago argitaratu ditu, non ikusten den nola soldadu amerikarrek torturatzen dituzten preso irakiarrak Abu Ghraib espetxean, Bagdaden.
Jakina zen bazirela argazki gehiago eta oraindik ere badirela beste horrenbeste edo gehiago argitaratu gabeak, baina gaur The Washington Post egunkari amerikarrak eman ditu argitara beste batzuk, eta horietan ikusten da nola erabiltzen zituzten txakurrak presoak izutzeko, eta nolako umilazioak eragiten zizkieten presoei.
Irudiez gain, egunkariak kaleratu ditu hamahiru atxilotu irakiarren testigantzak. Horiek adierazi dutenez, amerikarrek jo egin zituzten erruki gabe, eta umiliatu Ramadan hilean zehar. Aldi horretan, gainera, behartu zituzten edari alkoholdunak edatera eta txerri okela jatera.
Behartu gintuzten ibiltzera txakurren modura zaunka egin behar izaten genuen txakurrek bezala, osterantzean errukirik gabe joten gintuzten aurpegian eta bularrean, adierazi zuen atxilotuetako batek.
Donald Rumsfeld AEBetako Defentsa idazkariak debekatu egin du sartzea kameradun sakelako telefonoak, argazki makina digitalak eta bideo kamerak AEBetako armadak Iraken dituen instalazioetan. Oraingoz debekua indarrean jarriko da Iraken, baina laster zabalduko omen da AEBetara.
Defentsa Departamenduak uste du Abu Ghraibeko espetxean atera ziren argazki gehienak, non soldadu amerikarrak agertzen ziren preso irakiarrak torturatzen, atera zirela kameradun sakelako telefonoekin, eta hortik debekua. Begi itsuak, negarrik ez.