Googlek birdiseinatu egin du Blogger

Googlek erakarri nahi ditu blog erabiltzaileak, eta horretarako goitik behera birdiseinatu du Blogger, programa bat blogak sortu eta kudeatzeko. Blogger berriak aukera ematen du blog bat sortzeko amen-jesus batean. Hiru pauso eman, eta kito:

1. Kontu bat sortu.
2. Izena ipini blogari.
3. Aukeratu eredu bat.

Googlek orain 15 hilabete erosi zion Blogger Pyra Labs enpresari, eta harrezkero hauxe da Bloggerri egin dion eguneratzerik esanguratsuena.

Blogger doakoa da, eta aukera ematen du blog bat argitaratzeko e-posta duen edozein aparailutatik, sakelako telefonoak edo eskuko ordenagailuak barne. Bertsio berriarekin, gainera, irakurleek iradokizunak bidali edo soslai pertsonalak jar ditzakete blogean.

Aspaldi honetan Google lehia bizian ari da Yahoo! eta Microsoft enpresekin, nork irabaziko bilatzaileen guda. Laster hasiko da burtsan kotizatzen, eta buru-belarri ari da bere eskaintza zabaltzen.

Gehiago irakurri nahi izanez gero, klik egin hemen