Hasi da matxinada PPren kontra
Gauzak esku artean lehertu zaizkio PPri. Lehen manifestazioa Madrilen hasi da, arratsaldeko 19:00etan, PPren egoitzaren aurrean. Orain, berriz, manifestazio gehiago egiten ari dira Bartzelonan, Valentzian, Zaragozan, Santiagon, Sevillan eta Palma de Mallorcan, besteak beste. Denetan, egia eskatzen zaie popularrei, esan dezatela nork egin duen Madrilgo atentatua. Gauerako eltze-zalapartak deitu dira Espainiako hiriburu guztietan.
Partidu Popularrak eta Espainiako Gobernuak ez zuten horrelakorik espero. Arratsaldeko 19:00etan, 5.000 bat lagun bildu dira Génova kalean, Madrilen, PPren egoitzan, eta eskatu dute egia jakitea, nork egin dituen Madrilgo atentatuak. Manifestaziorako deialdia egin da sakelako telefono bidez kazetari batek esan du irrati batean berak hogei bat mezu jaso dituela eskuko telefonoan, lagunek-eta bidalita, eta Internet erabiliz.
Bi ordu eta erdi igaro dira kale agerraldia hasi denetik, baina jendeak han segitzen du. Haserrea, ordea, zabaldu egin da Estatu espainiarraren beste hiriburuetara, eta dagoeneko ez dago jakiterik zer gerta daitekeen gaur gauean, bozketa egunaren bezperan.
Espainiako irratiak jo eta ke ari dira zuzenean ematen manifestazioen berri. Atzerriko zenbait telebista ere, CNN eta Fox kasu, zuzenean ematen ari dira matxinadaren berri. Hona hemen azken orduko kontakizuna.
Madrilen
Madrilen jendeak protesta egiten segitzen du Genova kalean, PPren egoitzaren aurrean. Mariano Raxoi haserre agertu da, eta esan du manifestazio hori legez kanpokoa dela. Eta berau salatu du Hauteskunde Batzordearen aurrean. Hau bilera egiten ari da, PPren salaketa aztertzeko. Jendeak, berriz, erantzun dio Raxoiri: Ez goaz inora, hildakoek deitu digute!
Quevedoren bidegurutzean, berriz, Madrilen bertan, zenbait jende eltze-zalaparta bat hasi da egiten, beste batzuk autoen adarrak jotzen, eta gero eta jende gehiago ari da irteten balkoietara, zalapartan parte hartzera. Horrela entzun dugu irratian. Hiltzaileak, hiltzaileak! oihu egin du jende askok.
Bartzelonan
Hamarrak eta laurden zirenean 1.000 bat lagun zeuden PPren egoitzaren aurrean, eta jende gehiago iristen ari zen. Manifestazioa liskarrik gabe egiten ari zen.
Zaragozan
Hemen ere 1.000 bat pertsona bildu dira Espainia Plazan, denak bakean. Oihu hauek entzun dira: Botoa eman aurretik, egia jakin nahi dugu, eta Irakeko bonbak Madrilen lehertu dira.
Santiago de Compostelan
Han ere PPren egoitzaren aurrean bildu da jendea, pare bat orduz. Dagoeneko hasi dira etxera bidean. Gauerdirako, ordea, eltze-zalaparta bat iragarri dute.
Valentzian
Laurehun bat lagun bildu dira udaletxeko plazan.
Erantzunak
Ikusirik jendea haserre dabilela Espainiako gobernua manipulatzen ari delako atentatuaren kontu hau guztia, PPk erabaki du hauteskunde egunaren bezperako filma aldatzea TVE1en. Kaleetan ezin badu, etxeetan sartu nahi du egun hauetako mezua ETA da susmagarri nagusia Madrilgo atentatuan, jendea botoa ematera joan aurretik.
Horretarako, kendu egin du Shakespeare enamorado filma, eta jarri du Asesinato en febrero, non kontatzen baita nola ETAk hil zuen Fernando Buesa.
Batzuk manipulatu egiten dutelako eta beste batzuk non dauden ere ez dakitelako, hemen gauzak errotik aldatu beharrean, PPren alde egiten da beti.
Oraingoan, Acebesen azken adierazpenak zuzenean eman beharrean (bideo zinta bat jaso omen du poliziak islamiarren erreibindikazioa jasotzen), gure EITB enteratu ere ez da egiten, betiko txotxolokeriekin segitzen du programazioan.
EITB, EAJ, EA... ez al dira oraindik enteratu informazioa bera dela erabil dezaketen bide bakarra PPren manipulazioari aurre egiteko?
Antza denez, EITB lotan dago ordu honetan.... Bitartean -errotatibak erdi itxita daudela eta aprobetxatuz- Acebesen prentsaurrekoak hor irrati batean edo bestean galduta...
Matxinadak aurrera darrai. Webgune hauetan izan dezakezue berri gehiago honen gainean: