PTT teknologia probatzen ari dira Europako telefono konpainiak

Cannes-en egin duten mundu mailako 3GSM kongresuan PTT sistema duten poltsikoko telefonoak aurkeztu dituzte hainbat fabrikatzailek (Motorola, Nokia, Siemens, Nortel...). Fabrikatzaile horien arabera, dagoeneko hasi dira Europako 70 bat operadore zerbitzu hori probatzen eta teknologia berri hori merkaturatzeko estrategia egiten.

Teknologia horrek Walkie-Talkie moduan funtzionatuko luke, beti ere PTT-a duen beste poltsikoko telefono batekin. SMS mezuak bidaltzea moduko zerbait izango litzateke, baina ahozko mezuekin. Zenbat aldiz gertatu zaizue poltsikoko telefonoan mezu bat idazten hasi eta ezin? Izan ere, geroz eta botoi txikiagoak egiten dituzte eta ez da erraza botoi bat bakarra zapaltzea. PTT teknologiaren bidez, nahi duzun hartzailea aukeratu, botoia sakatu eta hitz egin, beste lanik ez duzu.

Nola erabiltzen da?

• PTT erabiltzeko zerbitzu hori aktibatu behar da, bakoitzaren hornitzaileari esanda. Ondoren, kontaktuen zerrenda bat (BuddyList) instalatu beharko da.
• Zuk daukazun kontaktu bakoitzak telefonoa zerbitzuan edo zerbitzuz kanpo duen esango dizu zure poltsikoko telefonoak, messenger-etan gertatzen den antzera.
• Hala ere, bakoitzak bere egoera aldatzeko aukera ere badu: telefonoa zerbitzuan egon arren, jarri daiteke zerbitzuz kanpo dagoela; edo, nahi izanez gero, nahi ez diren pertsonen mezuak debekatu daitezke.
• Azkenik, nahikoa da nahi den kontaktua aukeratu, botoia sakatu eta hitz egitea.

AEBetan arrakasta handia

Estatu Batuetan hasi ziren PTT teknologia erabiltzen eta arrakasta handia izan du. Izan ere, SMS famatuak ordezkatu ditu. Dagoeneko, 13 milioi estatubatuarrek erabiltzen dute "walkie-telefonoa".

Merkeagoa, baina ez doanekoa

Poltsikoko telefonotik deiak egitea baino merkeagoa da PTT erabiltzea, baina ez da doanekoa. Europako operadoreek uste dute irabaziak gutxituko zaizkiela SMSen erabilpena ordezkatzen badu teknologia berriak. Baina, litekeena da PTT mezuen prezioa euro baten ingurukoa izatea.