Teknologia albisteak

Estepona, kazetaritza-hiria

Joxe Aranzabal

2004-03-01 : 14:03

Asteburu honetan Esteponan izan naiz, Malagan, bilera batzuetan, non aztertzen zen diseinua prentsan. Bi egunean gauza asko ikusi ditut han, baina batek eman dit atentzioa: nola Estepona erabiltzen ari den komunikazioa eta garapen iraunkorra Marbelllaren eredutik bereizteko.

Estepona leku pribilejiatu batean dago, Mediterraneoaren ondo-ondoan. 50.000 bizilagun ditu, eta urtean zehar giro ezin hobea: 300 egunean tenperatura ez omen da jaisten 20º Ctik behera. Hori dela eta, etxegileak eta agentzia inmobiliarioak jo eta ke ari dira eraikitzen. Eta, egia esan behar bada, sekulako anabasa antolatu dute orain arte. Nahikoa da esatea Jesus Gil famatuaren seme bat izan zela alkate han, eta igartzen da.

Orain, berriz, beste alkate bat dute, Antonio Barrientos, sozialista, eta honek beste jite bat eman nahi dio hiriari:

Garapen iraunkorra bultzatu nahi du, eta urrundu Marsellak alboan ezarri duen eredutik.
Komunikazioa erabili nahi du, Estepona bereizteko inguruko hirietatik. Alkatea prest dago hainbat azpiegitura sortzeko komunikazioaren inguruan: komunikazio-museoa, eta ekitaldiak urtean zehar, erakarriko dituztenak kazetariak mundu osotik.

Lau ekitaldi urtean

Egitasmo horren barruan, Esteponako Udalak lau ekitaldi antolatuko ditu urtero, eta denek zerikusia izango dute komunikazioarekin:

Munduko Goi Bilera: Diseinua Prentsan, otsailaren 26tik 28ra egin da. 150 lagunek hartu zuten parte goi bileran, 40 herrialdetatik iritsita, gehienak kazetariak eta prentsako diseinatzaile profesionalak, ahaztu barik ikasle andana bat, joan zirenak Andaluziako Gobernuaren beka bati esker. Datozen egunetan jakinaraziko dizuet han ikasitako zenbait gauza interesgarri.
Jardunaldiak: Gerra Berriemaileak. Apirilaren 29an eta 30ean egingo da, Esteponako Kongresu Jauregian. Han elkartuko dira Vietnamen, Bosnian, Afganistanen eta Iraken izandako hainbat berriemaile, gai horren inguruan hausnarketa egiteko.
Uda Ikastaroak. Uztailean laupabost modulu egingo dira, irratia, telebista eta prentsaren inguruan, denak Malagako Unibertsitatearekin elkarlanean.
Kazetaritza Digitala. Topaketa moduan antolatuko dira, datorren azaroan. Oraindik zehazten ari dira nola egingo diren.

Komunikazio-jauregia

Oraingo biltzar-jauregia eraitsi egingo dute, baina hantxe bertan eraikiko da komunikazio-jauregia, non ezarriko diren Komunikazioaren Museoa, irratia eta telebista, biak udalarenak, areto handi bat kongresuak-eta egiteko, komunikazio lantegiak, etab., etab.

Laburbilduz, alkateak ez du nahi turismo masifikaturik herrian, eta, hori lortzeko, prest dago lantzeko beste garapen eredu bat. Eta asmo horren lagungarri, aurkitu du ideia bat, komunikazioa, zeinen inguruan saiatuko den eraikitzen Esteponaren irudi berri bat.