Elurra ari du, kontuz errepidean
Arratsaldeko 15:30ak ezkero elurra ari du mara-mara Euskal Herriko zenbait lekutan. Ondoko albiste honetan saiatuko gara esaten, zuen laguntzarekin, nola dauden gure errepideak, eta mendateak irekita dauden ala ez.
Kanpazar, oraingoz zabalik
Eusko Jaurlaritzaren Trafiko Sailak esan digu Kanpazar oraindik irekita dagoela, baina kontu handiz ibili beharra dagoela, eguraldia txarrera egiten ari delako.
Kanpazarko harrobira ere deitu dugu, eta esan digute autoren bat edo beste pasatzen ari dela, baina oztopo handiekin, elur asko egiten ari baita. Gainera, bi kamioi gurutzatuta geratu omen dira Kanpazartik Arrasatera bidean, eta horrek eragozpenak eragin ditu trafikoan.
Beraz, Kanpazar igaro behar duzuenok, hobe duzue lehenbailehen abiatzea, ahaztu barik kateak aldean eramaten, beharbada behar izango dituzue-eta. Bilborantz zoaztenak, bestela, hobe zenukete autobide hartzea Bergaran, gero Bizkairantz egiteko.
Elorrioko inguruak zuri-zuri daude arratsaldeko laurak ezkero. Hemen ordu erdi lehenago hasi da elurra gogor, eta oraingoan igarri da benetan datorrela ekaitza.
Trafiko Sailak webgune bat du, eta hor agertzen da mendateak nola dauden, baina ez dirudi eguneratuta dagoenik. Telefonoz deitu nahi izanez gero, deitu hona mendateen berri jakiteko: 902 11 20 88.
Dena dela, Sustatun saiatuko gara lehen eskuko informazioa ematen, gure irakurleen bidez. Animo eta idatzi nola dauden errepideak zuen inguruetan. Eskerrik asko!
Erantzunak
Deitu berri dugu trafiko sailera eta bertan esan digute Arlaban-go portua eta Gatzagako errepidea itxita daudela. Elurra ari du gogor.
Kanpazar zabalik dago, baina arretaz gidatu behar da. Elurra ari du hemen ere.
Elgetatik Eibarrerako eta Bergarako errepideak zabalik daude. Kanpanzarretik Elgetara bidean kontu handiz gidatu behar da. Laister pasako da elurra kentzeko kamioia. Informazio hau Elgetako webgunetik hartu dugu.
Trafiko Sailetik informazio hau eman digute:
- Deskarga: zabalik.
- Etxegarate: zabalik.
- Arlaban eta Gatzaga: itxita.
- Udana: zabalik, baina ibilgailu artikulatuendako itxita.
- Kanpazar: zabalik, baina elurra ari du.
- Leizaran autobia (Irurtzun-Andoain): zabalik.
Errepide guztietan arreta handiz gidatzea aholkatzen da.
Arratsaldeko 18:00etan Euskadi Irratiak esan berri du arazoak daudela gune hauetan:
- Altuben auto iladak daude Gasteizera bidean, trafiko handia dabilelako.
- Erletxetan auto istripu handi bat izan da arratsaldeko 14:45etan: bi kamioik eta furgoneta batek talka egin dute, eta ondorioz bi pertsona hil dira. Bideak itxita segitzen du, eta horregatik trafikoa desbideratzen ari dira A-8 autobidera.
- Arrigorriagan ere auto iladak daude, bazkalostean kamioi batek izandako istripu baten ondorioz.
- Miarritze-Hendaia tarte horretan ehunka kamioi daude geldirik, ez aurrera, ez atzera.
- Deskarga eta Elgeta irekita daudela esan dute.
- Nafarroan, berriz, arazoak daude sare nagusian: Urkiaga itxita dago, Belate bezala. Lizarran, Belaguan eta Artesiagan, kateak behar dira. Nafarroako Trafiko Zuzendaritzak gomendatzen du arreta handiz gidatzea.
Hori esatea baino hobe ez al da Euskal Herri osoan esatea, gure herriaren banaketa artifizialetan alferrik sakondu beharrean?
Beste kontu bat, ez dut ulertzen zelan den posible, urtero-urtero, horrelako arazoak egotea. Elurteak ustekabean harrapatu bagintu, hainbestean, baina duela egun batzutatik iragarrita zegoen. Eta atzo jadanik A-15ean arazoak egon ziren, hainbat portu garrantzitsu itxi dira... ez dakite gatza behar dela ala? Eta behar bada, gehiago bota eta kitto, baina ez da logikoa aldiro-aldiro berdin ibiltzea.
Alemanian asteak eta asteak ematen dituzte elurraren men, zelaiak zuri-zuri daude, baina errepide nagusietan ez da horrelako arazorik egoten, bizpahiru egun lehenago Poliziak berak zuritzen ditu errepideak, gatz pilo batez. Baina hemen, beti berdin.
Txalotzekoa da egun hauetan Elgetako Udalak nolako jarraipena egin dion bere webgunean errepideen egoerari. Bai atzo eta bai gaur, jarraipen zehatza egin du, goizean goizetik hasita.
Zorionak!
Arrasateko udaltzainei deitu diegu, eta hau da esan digutena: Kanpazar, Udana, Kurtzeta eta Deskarga mendateak itxita daudela; gehienetan kamioiekin arazoak izan dira.
Kanpanzarren, esaterako, kamioi bat gurutzatuta geratu da errepidean. Orain atertu egin badu ere (17:10) mendateetan elur asko pilatu da, eta horrek arazo handiak sortu ditu.