Apple eta HP eskutik helduta, musikaren arrimuan

Harrigarria bada ere, albisterik deigarriena macintosh ordenagailuaren 20. urtemugan ez da gertatu Macworld urteroko erakusketa erraldoian, San Frantziskon, baizik eta Las Vegasen, Consumer Electronic Show delakoan. Azken honetan jakin izan da HP eta Apple enpresek hitzarmen bat egin dutela, zeinaren bidez, sagarraren enpresak iPod musikagailuak egingo baitizkio HPri, honek bere izenarekin sal ditzan. Horrekin batera, HPk instalatuko ditu bere ordenagailu guztietan iTunes programa.

Hitzarmen honen bidez, Apple urrundu egin da orain arte ordenagailuetan izan duen jarreratik, alegia, bere sistema eragilearen jabe bakarra izatetik. Horrek atarramendu eskasa eman zion PCetan, non Microsoft bihurtu zen de facto estandarra, bere sistema mundu guztiari lizentzian saldu eta gero.

HPk, aldiz, mezu bat bidali dio Microsofti, bere negozio lagunik handienari: ez nauzu ondoan izango beti eta ezinbestean. Aurretik esaten zen HPk berak sortuko zuela beste aparailu bat, musika jotzekoa, baina ikusirik nolako arrakasta izan duen iPodek, erabaki omen du hau dela merkatuan dagoen aparailurik onena eta ez duela merezi beste bat sortzea, horrekin lehian egiteko.

Applek jakinarazi du San Frantziskon 2 milioi iPod saldu dituela jogailua sortu zuenetik 2001ean eta 30 milioii abesti iTunes Musika Dendan iragan apirila ezkero.

Berritasun gutxi Macworlden

Aurtengo Macworld erakusketak, berriz, nobedade gutxi eskaini du. Jende asko ibili omen da batetik bestera, baina ezer ez da aurkeztu jendea aho zabalik uzteko modukorik. Aintzat hartzekoak izan dira, hori bai, berritasun hauek:

• iPod mini musikagailu pinpirin bezain garestia. 4 GB ditu eta 249 dolar balio du. Ezin konparatu, ostera, Dell konpainiaren Dell DJB jogailuarekin, zeinak 15 GBtan balio baitu 224 dolar.
• iLife berritua. Honek ditu iTunes, iPhoto, iMovie eta iDVD berriak, nork bere etxean presta ditzan film, argazki, diapositiba edo aurkezpenik kutunenak. Hala ere, Applek aplikazio berri bat erantsi dio pakete honi, GarageBand, musika sortzeko. Pakete osoa doan salduko da ekainaren 6tik aurrera saldutako mac guztietan. Bestela, 49 dolar balioko du.
• Final Cut Express 2, DVDak editatzeko. 299 dolarretan salduko da.
• Xserve G5 zerbitzariak, enpresa txikietan sartzeko asmoz.
• Office 2004, Microsoftek egina macentzat. Apirilean-edo aterako da.