iPoden sekretu zikina

“Txikiak handia bentzi leidi asmoz ta jakitez” dio aspaldiko esaldi batek, adierazteko txikiak irabaz liezaiokeela handiari, baldin eta asmoz eta jakitez jokatzen badu, hau da, burua erabilita. Neistat anaia new yorktarrek ez zuten izango euskarazko esaldiaren berririk, baina ederki frogatu dute egia dela.

Dena hasi zen anaia bien iPod musika jogailuaren bateria agortu zenean betiko, 18 hilabetean lan egin eta gero. Casey eta Van Neistat anaiek Applera deitu zuten, jakiteko zer egin zezaketen: “erosi iPod berria —erantzun zieten—, bateria aldatzea jogailu berria erostea bezain garestia baita”. Hau da, 299 eta 499 dolar artean. Applek, gainera, urtebeteko bermea baino ez du eskaintzen bateriarentzat.

Txikiaren mendekua

Neistat anaiak mac erabiltzaile amorratuak dira, eta erosi egin zuten iPod berri bat, 400 dolarretan. Baina ez ziren hor geratu. Bi minutuko film bat egin zuten beraien esperientzia kontatzeko, eta sarean ipini.

Filmak izena du iPoden sekretu zikina, eta bertan ikusten da nola anaietako batek prestatzen duen mezu bat —“iPoden bateriak ezin dira aldatu, eta bakarrik irauten dute 18 hilabete”—, Applen mantenimenduko baten ahotsa entzuten duen bitartean. Ondoren, kalera joan eta iPoden aldeko karteletan pintatzen du esaldia, behin eta berriro.

Filmak sekulako arrakasta izan du, eta jende askok ikusi du munduan zehar. Horren ondorioz seguru asko, Applek aldatu egin du orain arteko politika, eta aukera ematen hasi da bateria berria erosteko, 99 dolarren truk.

Anaiek ondo hartu dute Applen politika berria. Haien iritziz, filma geratu da beraien esperientziaren lekuko gisa. Berau egiteko erabili zuten macintosh ordenagailu bat eta iMovie doako programa.