Kontseiluak aukera handiak ikusten ditu Akordio Sozio-politikoa lortzeko
Euskararen Gizarte Erakundeen Kontseiluak hilaren 18an emandako prentsaurrekoan azaldu zituen orain arte alderdi politikoekin eta sindikatuekin izaniko bilerak. Euskara sustatzeko eta euskalgintza babesteko Akordio Sozio-politikoa lortzea da bilera horien helburua. Xabier Mendigurenek azaldu zuenez, izaniko harremanetan alderdiak eta sindikatuak prest azaldu dira prozesu honetan jarraitzeko.
Alderdi eta sindikatuak
Alderdi eta sindikatu hauekin elkartu da Kontseilua: Aralar, Batasuna, EAJ, EA, Nafarroako Ezker Batua, EAEko Ezker Batua, Zutik, ANV, ELA, LAB, HIRU, STEE-EILAS, ESK eta CCOO. Beste alderdi batzuekin bilera egiteko prestutasuna azaldu du Kontseiluak.
Kontseiluko idazkari nagusiak Akordio Sozio-politikoaren beharra azpimarratu zuen, "bi arrazoi nagusiengatik. Bata, euskararen normalizazioaren prozesuaren adierazle diren faktore batzuek moteltze kezkagarria erakusten dutelako eta, bestea, euskararen gizarte erakundeek gero eta era nabarmenagoan pairatu behar duen jazarpenak kezka larria sortu duelako hiritarren artean".
Iñaki Lasak, Kontseiluko Ildo politiko-instituzionalaren arduradunak, hemendik aurrera egin beharrekoa azaldu zuen. Izan ere, Kontseiluak alderdiei eta sindikatuei bere ekarpena bidali die, Euskara sustatzeko eta euskalgintza babesteko Akordio Sozio-politikoaren neurriak. Ekarpen honetan euskara sustatzeko eta euskalgintza babesteko neurri zehatzak azaltzen dira.
Erantzun
Sartu