Garaiz zabiltza Buber sarietan gune euskaldunen alde egiteko

Interneteko urteko euskal webgune onenak saritzeko asmoa du sari horrek, eta hainbat ataletan ematen dira sariak. Atal horietako batzuetan, lehian daude gune euskaldunak (edo elebidunak beste batzuetan), gune erdaldun hutsen aldean. Baina jakina, bozkatzeko aukera duten euskal internauten artean, euskaldunak gutxiengo demografikoa gara, eta partehartzaile erdaldunek, euskaraz ezer onik egin den ere ezin dute apreziatu gune euskaldun horietan, ez baitute ulertzen. Hortaz, euskaldunek ez badugu euskal guneen alde egiten, ez du inork egingo.

Zuk zeuk ere egin dezakezu zeurea. Bozketan parte hartzeko helbidea hau da, http://buber.interneteuskadi.org/bozketa_eu.php eta bertan, @Euskadi boletineko harpideduna baldin bazara, berehala eman ahal izango duzu botoa.

Ez baldin bazara @Euskadiko harpidedun, lasai, bi minutuko kontua da, baina, adi, bi egunetan egin beharrekoa. Komeni da gaur ostegunez edo bihar ostiralez harpidetzea boletinera (minutu bateko lana), eta ASTELEHENEAN bozketa egitea (bigarren minutua). Harpidetzaren eta bozketa-baimenaren artean tarte bat jarri dute sistema antolatu dutenek, horregatik urrats bikoitz hau.

Baina urratsak, errazak dira, eta bi minutuko kontua. Instrukzio zehatzak utzi ditugu PDF batean. Klikatu, inprimatu eta ekin.

Bozketa emateko orduan, atal bakoitzean zer egin? Euskarari zor zaion errespetuaren aldetik, honakoa da egoera:

• Euskal erakundeen gune onenetan, Euskadi.net eta Irun.org guneak lehian, biak elebidunak.
• Webgune pertsonaletan, biak erdara hutsez, hortaz... Agendalia eta Divulcat daude lehian.
• Kirol webguneetan, AupaAthletic.com erdara hutsez dago, eta aldiz, Athletic Club taldearen gune ofiziala euskaraz ere bada.
• Hedabideen kategorian, Canal Bizkaia erdaldun hutsa lehian dago Euskonews elebidunaren kontra.
• Enpresa web gunerik onenerako, Akelarre jatetxearena, euskaraz eta beste zenbait hizkuntzatan dago. Baina Dedo Multimedia enpresarena gaztelania hutsez.
• Kultura web gunerik onenean, Dantzan.com gune euskaldunak meritu izugarria du, eta laguntza merezi du oihartzun mediatikoan fama handiagoa duen Fundación Catedral Santa María delakoaren aldean.
• Interneten euskeraren garapenaren alde lanik gehien egin duten web gunerako, BIZKAIe aldizkari elektronikoa eta Sustatu daude lehian. Ez dugu ezer Bizkaie-ren aurka, jakina, baina geuk, Sustatu izanda, geure aldeko botoa eskatuko dugu, naturaltasunez.
• Ataririk onena izeneko atal bat ere badago, eta Bakioko udala (elebiduna), erdara hutsez dagoen enteraT.com proiektua du aurkari.

Atal horietan aukeratzeaz gain, urteko webgune onena guztien artean hautatu behar da. Eta horretarako, hiru bakarrik dira euskara hutsezkoak zerrenda horretan: Bizkaie, Dantzan.com, Sustatu.

Egin zuen aukera. Lagundu Internet euskalduna hedatzen. Erraza da, hartu minutu bat gaur, eta beste bat astelehenean. Klikatu instrukzioen PDF-an eta aurrera.