Argi konpainiak prest Internet saltzeko
Iberdrola egun batzuk barru hasi daiteke Euskal Herrian Interneteko zerbitzuak eskaintzen, sare elektrikoa erabilita. Sistema honen bidez ez da beharrezko instalazio berririk egitea; nahikoa da PLC modem bat jartzea edozein indar ahotan.
Telekomunikazioen Merkaturako Batzordeak baimena eman die Endesa, Iberdrola eta Unión Fenosa enpresei, has daitezen Interneterako sarbidea eskaintzen sare elektrikoa erabilita. Halaxe jakinarazi du Cinco Días egunkariak. Hiru enpresa horietatik, litekeena da Iberdrola egun batzuk barru hastea zerbitzu berria eskaintzen, enpresako informazio iturriek esan dutenez.
Gakoa dago sare elektrikoan
Teknologia honen bidez, indar aho edo entxufe guztiak izan daitezke sarbide Internetera iristeko. Horretarako ez da kablerik sartu behar etxean edo enpresan. Nahikoa da PLC modem bat lotzea aho indar batean eta, voilà!, Internet zure eskura.
ADSLk bezala, PLCk ere eskaintzen du etengabeko lotura Internetekin, eta posible egiten du telefonoz hitz egitea sarean nabigatzen ari zaren bitartean. Hala ere, askoz ere bizkoarragoa omen da ADSL baino: segunduko bi megara ere irits daiteke.
Oraindik inork ez daki zer preziotan salduko duten zerbitzu berria, baina horretaz dakitenek diote ADSLren oso antzekoak izango direla.
/cache/photo_6014765054672619755_y_1_small_content.jpg)
Gaur hasi da Iberdrola sarbidea eskaintzen Internetera, baina ez Euskal Herrian, Madrilgo bi auzotan baizik. Horrelaxe dio Cinco Días egunkariak.
Zerbitzu hau ezartzeko, lehenengo ipini behar da aparailu bat auzoan. Ondoren, erabiltzaileak jartzen du modem txiki bat etxeko edozein indar ahotan. Modem hau Iberdrolarena da, doan ipiniko du eta bera arduratuko da mantentzeaz.
Auzoko modem guztiek seinaleak bidaliko dituzte auzoko aparailura eta honek bidaliko ditu hurbilen dagoen transformazio gunera, non batuko diren hainbat auzotako seinaleak. Handik, zuntz optikoa, irrati bidezko teknologia eta satelitea erabilita, seinalea bidaliko du Internetera.
Iberdrolak esan duenez, errentagarritasuna izango da irizpide nagusia zerbitzu hau hedatzeko orduan. Beraz, noizko Euskal Herrian?