Anboto orainkaria sarean
Anboto Durangaldeko Astekariak sarera jauzia egin berri du. Orain arte, Durangaldeko 8.000 etxetan banatzen zen astero euskara hutsezko eskualde horretako aldizkari bakarra. Orain, aldioro emango du Durangaldeko eta Bizkaiko berri.
Durangaldeko hamaika herritako berri eman izan du Anboto astekariak 2002ko azaroaren 16tik barikuro. Orain, aspaldiko asmoa egi bihurtu eta, internet bidezko informazioa zabaltzeari ekin dio.
Sustatuk sortu zuen bidetik anboto.org posta elektroniko bidez jaso ahal izango da bakoitzaren ordenagailuan, albiste berriren bat sareratzen den bakoitzean.
anboto.org Durangaldeko bapateko albiste-emaile izateko sortu da eta, astero bizkaieraz eta 8.000 etxetan banatzen den paperezko euskarriak izan ezin duen freskotasunarekin dator.
Anboto Durangaldeko astekaria bizkaieraz da, baina anboto.org orainkaria batueraz; hala ere, parte hartu gura duenak bizkaiera ere erabili ahal izango du anboto.org orrialdean informazioren bat sartu gura izanez gero.
Durangaldeko berri izan gura baduzue, sartu www.anboto.org gunean eta gozatu!
Erantzunak
Zorionak Anboto.org sareratzeko apustua egin zutenei zein egunero-egunero elikatzen duzuenoi.
Gaur bertan Glasgow-n bizi den lagun batek idatzi dit esaten asko pozten dela Elorrixoko notiziak irakurtzeaz. Irakurtzen ditu pasatu ahala, distantziak estropozu egin barik, doan, euskaraz...
Zorionak!
Iban
Elorrixo aipatzen duzunez, Anboto albistegiko albiste hau azpimarratu nahi nuke:
Elorrioko herritarrek txaloen bitartez azpimarratu zuten andrazkoak errebonbilo jantzirik ikusteari egoki irizten diotela.
Eta bitartean beste toki batzuetan mokoka emakumeak gizonekin batera tiroka egin eta desfilatzea nahi dutelako!
Harpidetzaz gain, mezuak bidaliz parte hartzeko aukera duzu, lagun.
Anboto.org guztion artean egin gura dugu; beraz, irakurleoi irizpide
zuzena eman gura dizuegu, zuen intereseko diren albiste eta ekitaldien
berri zuzenean eman dezazuen.
Dena dela, badira parte-hartzaileak nahita ez betebeharreko zenbait
arau:
- Artikuluak zure izen-abizenekin ematen saiatu, indar gehiago
du-eta. - Iritzia anonimoki eman gura bada, berriz, ez pertsonala izan beharko
da. Pertsona bati buruz ari bagara zehazki, kritikatzeko edo famatzeko,
anonimoek ez dute balio. Eta, kasu honetan pertsona fiskoez ari gara eta
ez entitate juridikoez. Entitate juridikoez (udalak, edozein elkarte...) anonimoki aritu daiteke,
baina, pertsonalizatu gabe eta jarrera eta errespetu onean; iraindu gabe,
doako akusaziorik egin gabe... Gauza bera gai orokorrez ari garenean.
Norbaitek pertsonalki sinatutako iritzi bati, berriz, pertsonalki
erantzutea dagokio, eta ez anonimoki. - Albiste eta erantzunetan errespetuz idaztea eskatzen da: irainak
nahiz erdeinuzko aipamenak ez dira onartuko, beraz, horrelakorik duten
albisteak ez dira argitaratuko, eta erantzunak ezabatu egingo dira. - Hizkuntz egokitasuna zaindu egingo da, eta, horretarako,
zuzentzaileak beharrezko aldaketak egingo dizkio idatziari. - Euskaraz ez datorren albiste eta erantzunik ez da sartuko, ezta
sartzeko itzuliko ere. - Anbotok albiste eta erantzunak desegokitzat jotzen baditu, horiek ez
argitaratzeko eskubidea izango du.
Parte hartzeko, beraz, ekin eta kontatuiguzu. Edozein albistetan ere, erantzun dezakezu.
Horrez gain, irakurle gisa parte hartzeko, harpidetzeko aukera ere hor daukazu.
Eskerrik asko.
> Anboto sarean batueraz pantauko dozuela irakurri dot astekarian, baina ez bertan ez sarekoan ez dot inun leidu erizpide hori zegatik hartu dozuen. Azaltzerik bai?
Galdereari erantzunaz, gurago geunke, paperezko astekarian lez, bizkaieraz jardutea orainkarian. Halan be, etorriko da hori be. Oraingoz, goazen Durangaldeko orainkari euskalduna egitera eta, poliki-poliki lortuko dogu bizkaieradun orainkaria egitea.
Euskalgintzan gehiegitan gertetan jakun lez, medioak eta gogoak ez doaz beti eskutik.
Halan be, barriren bat jarri gura dauen nonork bizkaieraz zein batueraz idatzi leiteke.
Eskerrik asko
CodeSyntax etxeak egindako webgunea da Anboto.org, Sustatu bezala. Zope web aplikazioen zerbitzariarekin eta Zope-ren Squishdot weblog makinariarekin egina dago.
Sustatu bezalaxe, gainera, harpidetuz gero albisteak etxean jasotzeko aukera dago. Albisteen sarrera besterik ez, traba handirik ez egiteko postontzian.
Ibilbide on, Anboto!