Nota hobeak izaten dituzte umeek Internet erabiltzaileak badira
Estatu Batuetan egindako ikerketa baten arabera, Internet erabiltzeak ez du inongo kalte psikologikorik sortarazten. Kalte baino, onura egiten diete eskola umeei. Nota hobeak ateratzen dituzte Internet erabiltzaileak badira.
Orain arte uste zenez, Internet erabiltzen zuten haurrek arazoak izaten zituzten gizarte erlazioetan eta ingurukoekin komunikatzeko orduan. Baina, Michigango unibertsitateko ikerketa horren arabera, guztiz kontrakoa gertatzen da; eskola umeek etekin handiagoa ateratzen dute ikasketetan Interneten erabiltzaile badira.
Banda zabaleko erabiltzaile gehiago
Nazioarteko Telekomunikazio Batasunaren txosten baten arabera, banda zabala eskuratu duten Internet erabiltzaileen kopurua %72 igo da. Gaur egun, Interneteko hamar erabiltzaileetatik batek banda zabala du.
Banda zabalak Interneten azkarrago nabigatzeko aukera ematen digu, eta horrekin batera edozein dokumentu errazago jaitsiko dugu. Horri lotzen badiogu, Internet erabiltzen duten eskola umeek nota hobeak lortzen dituztela, zera izango litzateke ondorioa: zenbat eta azkarrago nabigatu Interneten, orduan eta nota hobeak aterako dituztela eskola umeek. Hemendik urte gutxira, beraz, suspentsoak baino gehiago izango dira bikainak gure ikastetxeetan.
Zer iruditzen zaizue?
> Estatu Batuetan egindako ikerketa baten arabera, Internet erabiltzeak ez du inongo kalte psikologikorik sortarazten. Kalte baino, onura egiten diete eskola umeei. Nota hobeak ateratzen dituzte Internet erabiltzaileak badira.
> Zer iruditzen zaizue?
Horrelako kontuetan, txostena nork egin, emaitzak ere horren araberakoak. Aurrekoa zalantzan jartzeko arrazoi eta daturik ez dut eskuan, baina planteamentua beste era batera egitea ere zilegi dela uste dut.
Internet eta teknologia berrien erabilera handiagoa da baliabide ekonomiko eta maila kultural erdi-altua dutenen artean. Normalean notak ere horrekin lotuta egon ohi dira. Ez dakit non egin den ikerketa, baina Bronxeko edo Los Angeleseko auzorik zailenetan haurren notak txarrak izateak, ez dut uste zerikusirik daukanik interneten sartzen dituzten orduekin.
Gure artean ere ziurrenik, Euskal Herrian Andaluzian baino nota hobeak izango dituzte haurrek; eta ziur nago internet erabilera ere handiagoa dela gure artean. Baina bi datu horiek bata bestearen ondorio direla esatea...