Irailaren 11: kabinatik SMSak bidaltzen
Irailaren 11 egun seinalatua da askorentzat, estatubatuarrentzat batez ere. Baina, nik beste arrazoi batengatik izango dut gogoan egun hori: telefono kabinetan SMSak bidal zitezkeela jakin nuen eguna bezala gogoratuko dut nik irailaren 11.
Deskubrimenduaren hasiera
Ostegun arratsaldea da. Renferen aldiriko trenean etorri naiz Tolosara, lagun batekin geratuta nagoela eta. Triangulo plazan egin dugu zita, eta hara abiatu naiz ordua baino pare bat minutu lehenago. Puntu-puntuan iritsi naiz plazara, baina nire lagunaren arrastorik ez. Neska ez da oso puntuala, eta ordu laurden itxoiten egotea erabaki dut, ordurako ez badator, banoa. Baina, ordu laurden, ordu erdi, ordubete, eta lagunaren arrastorik ez. Poltsatik eskuko telefonoa atera eta lagunari deitzea pentsatu dut.
Hau kasualidadea, gehien behar dudanean dirurik ez segapotoan! Ondoan ditudan gazteei eskuko telefonoa eskatzea pasa zait burutik, baina ez dut inoiz ezer inori eskatzeko adorerik izan, eta orain gutxiago. Pixka bat lasaitzeko plazako kabina baten kontra jarri dut bizkarra, lagunak deitzea beste erremediorik ez dudala pentsatuz. Telefono kabinari begira jarri naiz. Zerbait arraroa antzeman diot. Teklatu arraroa, instrukzio arraro batzuk... Hara! Mezuak bidali daitezke eta!
Jarraibideak
- Lehenengo *01 markatu eta menuan sartzen zara.
- Menuan, bidali nahi duzun mezu mota aukera dezakezu, SMS, e-mail edo faxa.
- Hori eginda, mezua eta telefono zenbakia idatzi, eta OK teklari eman.
Gehienez 143 karaktere idatzi daitezke mezu batean, eta gehiago idatziz gero bi mezu jasotzen ditu hartzaileak. Mezua telefono finko batera bidaltzeak 15 zentimoko kostua du eta sakelako telefonora bidaliz gero, 18 zentimo kostatzen da. Hala ere, jakina da Telefonicako kabinek ez dutela zentimorik itzultzen, beraz 20 zentimo sartuz gero, kostu hori du mezuak.
Informazio bila
Aurkikuntza eginda, informazio gehiago biltzen saiatu naiz. Dirudienez, uztaila amaieran hasi zen Telefonica bere kabinetan zerbitzu hori eskaintzen. Software berezi bat ezarri dute kabina publiko guztietan, eta horrez gain, baita teklatu xelebre bat ere: zenbakien gainean letradun pegatinak jarri dituzte.
Beraz, badakizue, sakelako telefonorik eduki ezean, baduzue kabinetatik mezuak bidaltzeko aukera. Baina, argi, kabinek ezin dute eta mezurik jaso.
Erantzunak
SMS mezu bat mugikorrik ez duen bati bidali nahi diozula?
Jarraitu pauso hauek:
- Idatzi SMS hori mugikorrean (edo orain kabinetan, edo etxean...)
- Bidali nahi duzun telefono zenbakira.
Bidaltzen duzun telefono hori etxeko finkoa bada, morroi batek deitu irakurriko dio zure mezua jasotzaileari. Azento oso txarrik ez dauka euskarazko mezuekin. Jolasean froga egitea merezi du!!
Etxeko telefono finkotik ere bidali ditzakegu orain SMSak. Duela gutxi guri bidali zigun bat Timophonikak berak, hori iragarriz: Halako lehiatilatxo elektronikoa duten finkoetara edo konpainia bereko mugikorretara mezu idatziak igortzeko aukera.
Hilero euren aparatoa edukitzeagatik ordaintzen duguna eta gero, kriston grazia ematen digu bai aukera eder horrek. Eta oraingoz ezin dugu ezer egin gainera.
Atzo oso dei adeitsua hartu genuen etxean. Telefonicarekin lotutako komunikazio konpainia baten eskaintza zen.
(Euskaraz irakurriko duzuen arren, erderaz mintza zitzaizkigun):
-Telefonikako bezeroak zarete ezta?
-Euskaltelekoa ere bai. Telefonicakoak derrigor egia esan. Aparailua eta linea aldatu ezinik, halabeharrez dauzkagu.
-Apunta ezazu mesedez telefono zenbaki hau. Bertara deitu ezkero gure promozioan sartu ahal izango zarete.
-Esazu zenbakia nahi baduzu baina ez dugu deituko.
-klik. piii, pii, piii... (Besterik txintik ere esan gabe eskegi!!)
Edukazio ederra Timophonika eta enparauena.
Burubajetzaren alde lan egiteko motibu bat gehio.