"Iraultza" filmak irabazi du Urrezko Iratzea Bidasoako Film Laburren Lehiaketan
Lehiaketarako hautatutako 31 lanen artean Martin Roseteren Iraultza lanak eraman du aurtengo Bidasoako film laburren Nazioarteko Zinemaldia. Sari gehiago ere izan ziren atzo Zambran egindako itxiera ekitaldian.
Lan ugari aurkeztu dira, 60 lanetik goiti Bidasoako Film Laburren 6. Zinemaldian. 31 hautatu ziren lehiaketarako, eta horietatik 7k eraman dute saria.
- Sari nagusia, Urrezko Iratzea eta 3.000 euro Martin Rosete madrildarraren Iraultzak eraman du.
- Bigarren saria, zilarrezko iratzea eta 1.500 euro, Ivan Sainz-Pardoren Simonen Labirintoa lanarentzat izan da. Sain-Pardok iaz lehiaketako sari nagusia eraman zuen, Barraskiloaren ametsa lanarekin.
- Brontzezko bortz iratze banatu ziren, 1.000 euroko saria zutenak. Euskal Herriko lanik onena Aitzol Aramaioren Terminal izan da aurten. Euskal Herriko bertze film batek eraman du natura, ekologia, etnografia, ingurugiroa edota paisaiak ongien landu dituen saria: Safy Nebbou baionarraren Lepokoa lanak. Bake eta giza baloreen saria Luis Deltellen Erran Zerbait lanarentzat izan da, eta aktore onenaren saria Adriana Ozores espainiarrak jaso du, Galduak filmean egindako paperagatik.
Epaimahaiak, halaber, Lola Herrera, Carme Elias eta Maria Isasi aktoreek egindako lana goraipatu du, aipamen berezia eginez.
Publikoak, aldiz, Toni Bestard zuzendariaren Bidaia lana saritu du.
Aurtengo Zinemaldia arrakastatsua izan da hagitz, bai bertan aurkeztu diren lanen kalitateagatik, baina baita publikoaren harreragatik ere.
Film sarituak ikusteko gogoz denak, azkeneko aukera izanen du datorren asteartean, irailaren 16an, Iruñako Saide-Olite zinemetan.
Erantzun
Sartu