Irailaren 11ko ekintza: utzi liburu bat
Susako e-mailuetan irakurri dugunez, bolo-bolo dabil ideia Interneten. Kontua da ekintza poetikoa egitea. Liburua toki publiko batean laga, baina mezu bat idatzita. Animatzen zara ekintza honetan parte hartzera?
"Irailaren 11n ekintza egingo dugu" dio Susa literatura argitaletxetik jaso dugun emailuak.
Interneten bolo bolo dabil deia. Irailaren 11n (osteguna) ekintza poetiko bat egiteko abisua eskutik eskura. Deialdi bat dago, liburu bat eskuan hartu, "ezezagun bati" eskaini eta kalera ateratzekoa. Ostean liburu hori toki publiko batean lagatzeko (tabernan, jatetxean, liburutegian, geltokian, parkean...).
Liburua topatzen duenak, sari bezala hartuko du. "Lagun ezezagun hori, eskuartean duzun liburu hau, ez da galdua izan, apropos lagatakoa izan da, zuk, aurkitu duzun horrek, irakur dezazun. Ekintza hau, munduan zehar burutzen ari garen zenbait ekintza poetikoren parte da. Zuk ere parte har dezakezu, beste libururen bat apropos lagata. Horrelako eskaintza bat idatzi liburuan eta toki publiko batean laga, besteren batek aurkituko du gero...".
Emailuak doan jaso ditzakezu posta elektroniko bidez. Ekintza honen berri ematen duena 87. emailua da, baina orain artekoak ere irakurri ditzakezu Susaren gunean.
Larrabetzun beste mota bateko ekintza eroango dogu aurrera. Iazko arrakasta ikusita berriz ere New Yorkera abiatuko gara, literatura eta musika hizpide hartuta.
Irailak 11 New York: musika & literatura hitzaldi musikatua eskainiko digu Gotzon Hermosilla kazetari eta idazleak. Bere Road movie kronika liburua aitzaki hartuta Barakaldoko musikazalea gonbidatu dugu gurera.
Alberdaniako Zer berri sailean argitaratutako kronikan New Yorketik abiatutako bidaia kontatzen du Barakaldokoak. Musika ugari dago liburuan, guneak, lokalak, taldeak, mitoak. Hoiek denak gaurkoan diskoetan ekarriko ditu iluntzeko 8etan Kukubiltxoko lokaletan egingo dugun hitzaldian.
Iaz, Harkaitz Cano izan zen gurean. Eta New Yorkera sekulao bidaia egin genuen beragaz. Hango berri, bitxikeriak, kontakizunak, anekdotak... luze egon ginen berbetan. Oso giro jatorrean. Imajinatuko duzue. Irailak 11 hizpide den egunean, guk ere aktualitate izan gura genuen, eta literatura hartu genuen aitzaki. Berba eta berba, Canok etxerako hegazkina galdu zuen ia ia.
Gotzon Hermosillaren berbaldirako prest dago jada dekoratua. Kukubiltxoko entsegu gelak, New Yorken antza hartu du. Etxeorratzak, musika kalean, hegazkinak zeru gainean, eta literaturzaleak lurrean jezarrita.
Biharamunean kontatuko dogu.
bihotz bakartien kluba