Kirol elkarteen eskuliburua

Urola Kostako Udal Elkarteak, Kirola Euskaraz programaren barruan, EUSKARA SASOIAN egitasmoa jarri zuen martxan 2002an. Egitasmo horren helburua eskualdeko kirol elkarteetan euskararen erabilera areagotzea da.

Iaz, eskualdeko kirol elkarteen (47) hizkuntza egoera aztertu zuen udal elkarteak. Ondoren, emaitza aztertu eta esku-orria kaleratu zuen kirol elkarteei, udal zerbitzuei eta herritarrei horren berri emateko.

Azterketaren arabera, kirol elkarte horietan euskara sustatzeko oztopo nagusia jarduera idatzian aurkitzen da. Horri aurre egiteko EUSKARA SASOIAN 2003 egitasmoak honako lan ildoak finkatu ditu:

1. Kirol elkarteen eskuliburua sortzea: eskuliburuak hainbat argibide eta eredu eskaintzen ditu ohiko idatziak euskaraz egin ahal izateko. Horrekin batera kirol jarduerari buruzko hiztegia eta elkarte funtzionamendurako hiztegia ditu, beste hainbat argibiderekin batera.
2. Eskuliburua erabiltzeko eta ohiko idatziak lantzeko ikastaroa antolatzea kirol elkarteetako kideentzat. Ikastaro horiek 2003ko urrian eta azaroan egingo dira.
3. Kirol elkarteei euskararen erabilera areagotzeko hitzarmenak eskaintzea: 3 hitzarmen eredu prestatu ditu Udal Elkarteak, A, B eta C, konpromiso mailaren arabera. Udal Elkartea kirol elkarteekin banan-banan biltzen ari da (ekaina eta uztailean) hitzarmenen berri emateko. Udazkenean berriz bildu eta hitzarmenak burutu eta sinatuko dituzte. Udal Elkarteak kirol elkarteei zerbitzua eskainiko die (aholkularitza, itzulpen zerbitzua, planak diseinatu eta jarraipena egiteko zerbitzua), eskuliburuarekin eta trebakuntza ikastaroarekin batera.

Udal Elkartea egitasmo hori bideratzen ari da PLANIKER, K.E. elkartearekin elkarlanean.

Urola Kostako Udal Elkartea
Euskara Zerbiztua
943 89 43 06