Musikaire, Udako Jaialdiak Elorrion

Elorrioko Uda Jaialdiek izen berria dute, Musikaire, eta hau gaur eguerdian aurkeztu da Bilbon, agintari eta babesle artean.

Aurten 15 ekitaldi antolatu ditu Musikairek, denak asteburuetan eta aire zabalean, aprobetxaturik Elorriok dituen paraje eta eraikin paregabeak. Hamabost jaialdi horietan musika klasikoa entzungo da, musika etnikoa, jazza eta antzerkia. Talde batzuk baino ez aipatzearren, Bidinte izango dugu, New Orleans Gospel Chorale, Brassas Company, Jose Luis Monton eta Tangata. Edo antzerki eta dantza talde zenbait. Guztira 200 bat artista bilduko dira Elorriora.

Musikaire prestatzeak lan handia dakar: 30 lagun arituko dira buru-belarri eginbehar horretan. Ikusleak, berriz, 5.000 bat espero dira.

Sei urteko esperientzia

Izen berriarekin plazaratzen bada ere, Elorrioko Uda Jaialdiak orain sei urte hasi ziren, Arriola Kultur Elkarteak bultzaturik. Hasieran esperimentu hutsa izan zen, bihozkada batean oinarritua: zergatik ez aprobetxatu Elorriok dituen paraje zoragarriak musikaz gozatzeko?

Urtea joan eta urtea etorri, esperientzia indartu egin da eta gero eta arrakasta handiagoa izan du. Antolatzaile taldea zabaldu egin da, musika motak ireki eta jendea ere, ugaritu.

Musikaire etorkizunean

Iaz antolatzaileak konturatu ziren Elorrioko Uda Jaialdiek bazutela nortasunik Elorrioren mugaz harantzago egiteko, Durangaldera Bizkaian, eta Deba ibarrera, Gipuzkoan. Hala ere, nahiago izan zuten sakon hausnartu esku artean zuten guztia eta hitzarmen bat egin zuten Mondragon Unibertsitatearekin, hango Marketin Departamenduarekin, marketin eta komunikazio plan bat egiteko.

Lan gehiena eginda dago, nahiz eta oraindik falta den azken ondorioak ateratzea. Hala ere, aurrera dezakagu hainbat puntu, markatuko dutenak jaialdi hauen geroa:

• Izena eta izana. Garrantzitsua da Elorrioko Uda Jaialdiek izan dezaten nortasun berezia, bereiztuko duenak beste jaialdietatik. Izan ere, gutxik daukate halako giro eta antolakuntzarik. Horregatik, aurrerantzean jaialdi hauek Musikaire izango dute izena, izana ere indartuz joango baita.
• Eman ta zabal zazu. Jaialdi hauen esparrua izango dira Elorrio eta bere inguruak, baina badakigu produktu hauen kalitateak erakargarri egingo dituela beste jende askorentzat.
• Aterpea bilatu. Musikairek babesle eta lankide sare zabala du. Hala ere, jaialdiak indartze aldera, zabaldu egin behar du sare hori, eta finkatu.
• Musikaire, Elorrion. Musikaire bihur daiteke Elorrioren bisita txartelik eraginkorrena kanpora begira. Horri esker, jende asko etor daiteke herria bisitatzera.

EGITARAUA

Ekainak 20, ostirala

San Agustingo elizan. (22:30) CAPELLA GREGORIANA EASO

Ekainak 21, larunbata

Gazetako Andra Mari ermitan. (22:30) BRASSAS COMPANY (Eguraldi txarra egiten badu, elizpean egingo da).

Ekainak 27, ostirala

San Jose ermitan. (22:30) BIDINTE (Eguraldi txarra egiten badu, elizpean)

Ekainak 28, larunbata

Argiñetan. (22:30) TANGATA (Tango laukotea)

Uztailak 04, ostirala

Elizan. (22:30) HAIZEA (Organoa, tronpeta)

Uztailak 05, larunbata

Elizpean. (22:30) NON DEMONTRE + LOGELA (multimedia ikuskizuna) (Eguraldi txarra egiten badu, Arriola antzokian).

Uztailak 06, igandea

Elizpean. (22:30). Antzerkia RAYUELA PRODUCCIONES TEATRALES “La controversia de Valladolid” (Eguraldi txarra egiten badu, Arriola antzokian).

Uztailak 11, ostirala

Elizpean. (22:30). Dantza KUKAI – TANTTAKA “1937 Gogoaren Bidezidorretatik” (Eguraldi txarra egiten badu, Arriola antzokian).

Uztailak 12, larunbata

Lourdesko Koban. (22:30) JOSE LUIS MONTON (Eguraldi txarra egiten badu, elizpean)

Uztailak 13, igandea

Plazan. (22:00). Antzerkia AL SUROESTE TEATRO “Los cómicos del carro”.

Uztailak 18, ostirala

Elizpean. (22:30) PIRINEOS JAZZ ORCHESTRA (Eguraldi txarra egiten badu, Arriola antzokian).

Uztailak 19, larunbata

Casajara Jauregian. (22:30) GRUPO BILBAO CAMARA (Eguraldi txarra egiten badu, elizpean).

Uztailak 20, igandea

Plazan. (22:30). Antzerkia BARTO (Eguraldi txarra egiten badu, elizpean).

Uztailak 25, ostirala

Elizpean (22:30) NEW ORLEANS GOSPEL CHORALE (Eguraldi txarra egiten badu, Arriola antzokian).

Uztailak 26, larunbata

Tola Jauregian (22:30) KRANSNOYARKS CHAMBER ORCHESTRA, SIBERIA (Eguraldi txarra egiten badu, elizan egingo da).