Gogoratzen Salam Pax? Bizi da

Sustatun luze eta zabal hitz egin genuen Salam Paxen inguruan. Harrezkero, ordea, ez genuen ezer gehiago jakin izan haren gainean.

Hala ere, atzo Interneten begiratzen hasi, eta hara non aurkitzen dudan The Indian Express egunkarian, Salam Pax bizi dela.

Arkitekto bat, 29 urtekoa

Antza denez, Salam Paxek Salam du benetako izena, 29 urte ditu, Vienan ikasi zuen arkitektura eta oso ondo hitz egiten du ingelesa. Eta —halaxe dio egunkariak— gay da, homosexuala. Maiatzean zehar interpretari lanak egin zituen Peter Maas kazetari amerikarrarentzat, baina honek inoiz ez zuen jakin izan haren nortasun ezkutuaren berri.

Peter Maas-ek ondoren jakin izan zuen Salam Paxek bere esanetara egin zuela lan, Estatu Batuetara itzuli ostean. Slate aldizkari elektronikoan kontatzen du nola jakin zuen haren berri eta nolakoa zen bere interpretaria.

Salam Paxen gainean dio jantzia zela eta prestua, gustu onekoa eta bizkorra. Hori bai, gidari eskasa. Blog kontuen gainean, berriz, antzik ere ez

“Sekula ez zuen aipatu blogintzan zebilenik, baina arreta handiagoa jarri izan banu, jakin nezakeen zerbait bazebilela esku artean. Luze ari nintzen idazten nire azken artikulua Iraken gainean, beraz, zenbaitetan neure gelan geratzen nintzen eta joateko baimena ematen nion hainbat ordutarako. Jeneralean sartzen zen ziberkafe horietako batera. Nik pentsatu nuen aprobetxatzen ari zela mezu elektronikoak bidaltzeko lagunei, nahiz eta askotan kexatzen zen zein garesti zen gauzak jaistea eta kargatzea. Hau arraro samar egin zitzaidan, zeren eta e-mailak bidaltzeak eta jasotzeak ez baitu banda zabalik eskatzen —ez bada, noski, ari zarela zintzilikatzen argazkiak zeure blogean eta jasotzen Bill Gatesek baino mezu gehiago”.

The Guardian egunkariak fitxatu du

The Guardian egunkari ingelesak fitxatu egin du Salam Pax. Hemendik aurrera, hantxe idatziko du, zutabegile moduan. Hala ere, ez dute jakinaraziko zein den Salamen benetako deitura, hura babesteko. Egunkariak dio edozeinek eraso lezakeela, oso kritikoa delako bai Sadamekin eta baita Bushekin ere, edo gay delako, besterik ez bada ere.

Bitartean, Iraken barrena ibili da Salam Pax eta hainbat kronika idatzi ditu. Hemen dituzue lehena, bigarrena, hirugarrena eta laugarrena