Teknologia albisteak

Udalbiltzaren alde kale agerraldiak gaur, 20:00etan

Sustatu - Sustatu

2003-04-30 : 13:04

Udalbiltzak deitu ditu alderdi abertzaleetako hautetsi guztiak gaurko kale agerraldietan parte hartu dezaten. Euskal Herriaren aurkako eraso zuzentzat hartu dute eragile abertzaleek. Espainiatik esan dute ezker abertzale historikoa kudeatzen duen erakundea dela udalbiltza. ETAren tresnatzat jo du epaileak.

(azken ordua: 13:17): bi orduko atzerapenarekin baina hasi dira atxilotuak deklaratzen. Ohi baino lehenago, konfidantzazko abokatuarekin eta komunikatuta. Bestetik, arratsaldeko 16:00etan bilera dago Astigarragan eta gizarte eragile guztiei dei egin badie ere, EAJ, EA eta ELA ez dira bertan egongo. Ugarteburuk esan duenez, nahiko tristea da Udalbiltza instituzio moduan izan baita erasotua. Euskaldunan onartu ziren helburuei lotuta egin dute eraso. Gaur ez badute erreakzionatzen noiz erreakzionatuko dute, beraien bila doazenean?

Eta susmo horiek direla-eta, 8 atxilotu izan dira gertatu eta lasterrera Sustatuko berrian esan genuen moduan. Egoitzetatik material pila bat eraman dute eta ez bakarrik egoitzetatik, baita atxilotuen etxeetatik ere. Elixabet Laburuk esan duenez, (Astigarragako alkatea) egoitzak prezintatu aurretik hustu egin dituzte.

Kale agerraldiak herriz herri

Mozioak aurkezten ari dira hainbat Udaletan. Egin zen protestaldirik ere herri batzuetan, baina gaur arratsaldeko 20:00etarako daude deituak herritarrak zein zinegotzi abertzale guztiak. Udalen aurrean izango dira bilkurak. Udalbiltzak adierazi duenez, erantzun baikorra eta biltzailea eman nahi da. Erabiliko den leloa izango da: Bai Udalbiltzari, Bai Euskal Herriari.

Acebesek eta Aznarrek esana:

ETAk eman dio Udalbiltzako hainbat pertsonari AuB eta hauteskunde plataformen sorrera eta sustatze prozesua kontrolatzeko agindua. Acebesek azaldu digu Garzonek egin duena. Aznarrek, berriz, gaineratu du mozorro bat gutxiago duela orain ETAk.