Nola jarraitu gerra Interneten
Jende askok nahi izango du Irakeko gerra sarean jarraitu, Sustatun eta beste webgune batzuetan, batez ere azken orduko albisteak jasotzeko. Hona hemen aukeraketa bat.
Bushek agintzen dituen tropak hasi dira Irak inbaditzen. Oraingo honetan susmoa dugu telebistek ez dutela ezer berezirik emango (aurreko gerran ere, Pentagonoak nahi izan zuena baino ez zuten eman, egia esan). Beraz, baliteke informaziorik bizkorrena eta osoena sarean aurkitzea.
Hori kontuan izanda, Sustatuk honako zerrenda hau prestatu dizue, gerraren jarraipena egiteko. Hemen denetik dago: agentzia ofizialak, inbasioaren aldekoak eta kontrakoak. Gero, nork bere gogokoa aukera dezala.
- GoogleNews Era guztietako informazio iturriak aurkituko dituzu hemen, maiz eguneratzen direnak.
- BBC Bretainia Handiaren hedabiderik indartsuena. Informazio mordoa.
- CNN Amerikarren ahotsa.
- Reuters Albiste agentzia ingelesa.
- Electronic Irak News Gerraren kontra dauden kazetari anglofono zenbaitek egina, ikuspegi independentea emate aldera.
- Al-Jazeera Qatar-ko telebista independentea. Hil honen amaierarako agindua zuen ingelesezko webgunea aterako zuela.
- Jerusalem Post Jakin nahi duenarentzat israeldarrek zer uste duten.
- Indymedia Ezaguna gure artean. Hortik bertatik, herrialde askotara joan daiteke informazio bila.
- Antiwar.com Izenak berak dio: Gerraren Kontrako Webgunea.
- Cursor Ez dakigu norena den hau, baina benetan iturri agortezina duzue informazioa bilatzeko gerraren inguruan. Hemen denetik aurkituko duzue.
- Periodista Digital Nahiago duzuenontzat informazioa gaztelaniaz irakurri.
Blogak eta Irakeko gerra
Ezin dugu ahaztu Sustatu weblog bat dela, fenomeno berrienetako bat Inteneten. Horregatik, txoko bat egingo diegu weblog edo blog deiturikoei. Hona hemen zenbait:
- WarbloggerWatch
- Arms And The Man Nor ari da sekulako negozioa egiten Iraken sarraskiarekin? Hori aztertzen du blog honek.
- Nowarblog
- Lying Media Bastards
Erantzunak
Telebista independentea esaten dugunean, esan nahi dugu ez dela gobernuarena. Izan ere, Qatarren badago beste telebista bat, gobernuarena. Horrek, egia da, ez du esan nahi independentea denik lan egiteko orduan, edo ez denik.
Halaber, egia da Al-Jazeera oso ezaguna dela herrialde arabiarretan, eta nolabait, herrialde haietako CNN bihurtu dela. Eta hori ez zaio bat ere gustatzen Uncle Sami, zalantzan jartzen baitu beraren nagusitasuna informazioa kontrolatzeko orduan.
Dena dela, eskerrik asko zehaztapenagatik.
> Bueno, ni aspertuta nago Sadam eta Castroren diktadura basatiekin.
Azkenean jakin izan dugu Iraken kontrako gerraren zergatia: mendebaldekoak aspertuta daude!
...eta kubatarrok erne ibili! zerrendan zaudete eta.
Non eta noiz entzun nuen nik ¡Estamos aburridos ya de los vascos! Madrilen izango zen? Ulertzekoa da beraz, Jarrai, Haika, Egin, Aek, Ekin, Gestorak, EH, Egunkaria, Batasuna eta abarrekin egindakoa.
Ze aspergarriak garen!!!
Modu ona aurkitu dozu gerrari buruz iritsia ematen hasteko. Castro eta Sadan, anti-imperialismoa,Al-yasira,e.a...
Akaso Coca-colari buruz idazten badot ni ere anti-inperialista naskagarria.Gaur Iraken hasi dena munduko inperiorik haundiena,zerbitzari fidel batzuen laguntzaz, planeta honetako beste lurralde batzuetara hedatzeko aitzakia bat besterik ez da.Dirua,petroleoa,botere mundiala.....eta Israel.Hoiek dira yankiak Irakeri erazotzeko arrazoi bakarrak eta honi munduko edozein tokitan inperialismoa deitzen zaio.
GERRARI EZ. BUSH-AZNAR HILTZAILEAK
BBC lan interesgarria egiten ari da sarean, antz handia duena Sustaturen lan egiteko moduarekin. Golkoan eta Ekialde Hurbilean dituen berriemaileak erabiltzen ari da, idatz ditzaten orri honetan beraien iritziak eta esperientziak. Bagdad, Kuwait Hiria, Cairo, Aman eta Erromatik idazten ari dira, besteak beste.
Sustatun antzeko zerbait egin genuen azken elurtea izan genuenean eta lanuzteak egin zirenean Egunkariaren alde.
Bai BBCn nola Sustatun, artikuluak laburrak dira eta zehatzak, subjektibismo puntu batekin. Azkenean, berriz, irakurleak jasotzen du puzzle oso baten ikuspegia.
Iruditzen zait kazetaritza egiteko modu berri bat jaio dela.
Sadam eta Castro dira bi diktadore, AEBetako gobernuak begiz jota dituena. Baina badira askoz ere diktadore gehiago hortik zehar, bapo-bapo bizi direnak amerikarren magalean.
Herri arabiarren artean, esate baterako, hor dituzu Maroko eta Saudi Arabia. Herri horietan ez dakite demokrazia zer denik ere. Baina nola diren estatu batuarren aliatuak, ukiezinak dira. Eta beste aldean, Israel dago. Irakek baino askoz ere gehiagotan urratu ditu Nazio Batuen ebazpenak. Eta, argi, honek ere suntsipen handiko armak dauzka. Baina hau ere amerikarren aliatua izaki.
Sam maitea, gauza bat da nork bere fobiak eta filiak izatea. Eta beste bat, oso bestelakoa, nazioartearen zuzenbidea errespetatu behar izatea. Bush eta bere akolitoen jokabideak gorrotoa lege bihurtu du, zoritxarrez.
> Asperuta gaude kolonianismo eta kapitalismo basatiarekin!
Utzi pakean Cuba !!nola erran dezakezu esan duzuna?aspertuta zaudela Cubako dikaturarekin?badakizu zer esaten duzula?
akaso pentsatzen duzu Espainian edo Euskal Herrian edo USAn badagoela "demokrazia" deitutakoa?
historiak epaituko ditu txakurrak,ta dirudienez zu horien artean izanen zera.
agian Neguriko faxista zea?
> historiak epaituko ditu txakurrak,ta dirudienez zu horien artean izanen zera. agian Neguriko faxista zea?
Sustatu plaza irekia da eta hemen denok dugu askatasuna geure iritziak adierazteko. Kasu honetan, gerraren aldekoek eta kontrakoek. Eta baita iritzi zehatzik ez dutenek ere.
Beraz, soberan daude irainak. Nik behintzat eskertuko nizuke horrelako hizkuntzarik ez erabiltzea beste sustatukide batzuk izendatzeko.
Bai laguna. Cuba diktadura bat da. Ezkerreko izateak ez dio demokrazia itxurarik ematen.
Nik ez ditut USA edo eta Españako demokraziak goraipatu. Hobetzeko asko daukate (adibidez Egunkaria), baina zalantzarik ez daukat: hemen askatasun gehiago dago Iraken edo Cuban baino.
Portzierto, badakizu zer egiten duten Cuban homosexualekin?
Kubako diktadura yankeek ezarri dute, faszismo, nazismo eta mussolininismo nazkagarriaz, hots, blokeo justifikaezinaz. Franco hil zen, baina zoritxarrez hemen inguruan ere haren oinordekoak jarraitzen dute. Irakurri ezak libururen bat: Gramsci, Bakunin, Durruti edo Chomsky, adibidez, hire ezjakintasunatik ateratzeko.
Zeinek esaten dizu ez dudala inoiz libururik irakurri? Nondik ondorioztatzen duzu pertsonai horien ezer ez dudala irakurri?
Zergatik uste dute progreek beraiek irakurri dutela mundu honetan irakurri behar den guztia, besteok ezjakin hutsak garenen bitartean?
Zergatik hain edukazio txarra? Irainik bota al dut nik zuen kontra? Ezin duzue eztabaida normal bat eduki?
Nik ez dizut irainik esan. Gomendio batzuk eman dizkizut. Eztabaida normala diozu... Zuretzako eztabaida normala zer da, zuk nahi duzuna esatea eta besteok bai, bai, bai, erantzutea? Zure argudioak oso pobreak iruditzen zaizkit. Nik ezagun estatubatuarrak ditut, eta haiek ere Irak erasotzearen aurka dude. Estatu terrorismorik ez!
Bai gizona, bai. Kuba diktatura bat da, Irak, Angola, Saudi Arabia edo Pakistan bezala. Eta Fidel Castro, tirano bat, Franco, Salazar, edo Mobuturen moduan. Ez nahastu Espainia edo AEB gaia desbideratzeko.
Kuban dagoen askatasun maila ez da ezta Euskal Herrikoaren orpoetaraino ere ailegatzen: han ez dago Alderdi Komunistakoa ez den beste hautagai bat aukeratzeko biderik (hauteskundeetara PC de C-a bakarrik aurkezten delako), ez dago informazio askatasunik (hedabide guztiak Alderdiarenak dira; "Granma" independientea al da?), ez dago Kubatik atera eta sartzeko askatasunik, ideiengatik jendea atxilotzen da (azken egunotan atxiloketa asko izan dira, legez-kanpoko gauzak idazteagatik), ez dago merkatu askatasunik (bertakoek ezin dituzte enpresak sortu, eta sortzekotan, beti gobernuaren eskutik eta bere kontrolpean), turismoaren multinazionalek sekulako etekinak dituzte bertakoen kontura eta gobernuaren honeritziarekin (adibidez, kubatarrak ezin dira bakarrik Varaderon sartu), teknologi aurrerapenak gobernuaren eta honek babestutako pribilejiodunen esku bakarrik daude (adibidez, ordenagailu bat, fax-a, edo webgune bat izatea, gobernuaren esku dago), eta abar.
Egia da Kuban ere sendakuntzan, zientzian, edo hezkuntzan aurrerapen asko izan direla. Baina hori lortzeko ez da inondik ere beharrezkoa Fidel Castrok egiten dituen askatasun murrizketak. Urrutira joan gabe, Euskal Herrian askatasun maila askoz handiagoa dugu (adibidez, Sustatu.com existitzea eta denok etxean internet eduki ahal izatea eskeitzen duena) eta teknologia esportatzen dugu Kubara.
Ez nahastu Euskal Herriko egoera. Kuba defenditu nahi baduzu egizu hango arrazoiekin, eta ez desbideratu gaia hemen dugun arazoekin.
Agur.
Al-Jazeera-ri buruz hau esaten duzue: Qatar-ko telebista independentea.
Seguru zaudete independientea dela? Amerikarrek ez dute kontrolatzen, ez. Baina horrek ez du esan nahi independientea denik.
Aspertuta gaude antiamerikanismoarekin.