Euskaltel, nos has tocado la fibra
Gatzagarrok pozik geunden e-debagoiena zetorrela-eta. Hala ere, hutsaren hurrengoa: ¡EUSKALTEL no has tocado la fribra!!
¡EUSKALTEL, nos has tocado la fibra!!
Badator, badator e-deb@goiena! Orain urte bete, lelo hau zabaldu zen bailara osoan. Gatzatarrok pozik geunden; badator kablea! Gainera, gure herria proiektu berri horren aurkezpena egiteko aukeratua izan zen. A zer ohorea! Pozarekin batera, urduritasuna, batez ere, gure herriko alkate eta zinegotziena. Ez zetorkigun lan makala: hainbeste politiko, enpresa-gizon eta, horiek atzetik dakarten jende konpartsa guztiari harrera on bat ematea.
Horrelakoetan gertatzen den moduan, Sorginak taldeko emakumeei ere lantxo bat egokitu zitzaigun: hain zuzen ere, gure espezialitatea den taloak egitea. Elkartu, eta guzti hori prestatzen hasi ginen: irinik onena Amezketako errotakoa; talogile trebeenak goizean goizetik prest; bertako txorixoak; gazta, euskal labelduna; Errioxako ardoa, noski... Amantalgerrikoak ere estreinatu genituen okasiorako; ospakizun horrek, guzti hori eta gehiago merezi zuelakoan geunden -eta.
Inuzente halakoak! Gatzatar gizajoak! Ondo baino hobeto sakatu digute! Zuntz optikoa garestiegia da zuena bezalako herri txiki batean jartzeko. Talo ederrak egiten dituzue, jarraitu horrelaxe! Ulertuko duzuen moduan errentagarritasunak agintzen du gaurko munduan . Hala ere, ez galdu esperantza, etorriko da eguna zuentzako ere. Betiko kontuak eta betiko aurrekontuak. Jakin badakigu, herri eta hizkuntza txikiak erraz baztertzen direla eta, boterea dutenek, horien ahotsak isilarazi nahi izaten dituztela.
Txikiak izan arren, gutxi izan arren, duintasuna osoz bete genuen egin beharra, herri txikietakoak betetzen dakigun bezala. Zer eman hura hartu dio euskal esaera zahar batek. Baina, gure honetan, hartutakoak ez du bueltarik izan.
Horregatik, sorginak garenok lau haizetara esan nahi dugu:
!EUSKALTEL no nos toques la fibra! Sorginak emakume taldea
Leintz-Gatzaga eta gainontzeko herrietarako beste aukera bat egon daiteke, eta zera da: Iberdrolaren sarea erabiltzea, bai tentsio handikoa zein tentsio erdiko sarea. Beraz, sare hori erabiliko litzateke komunikazioetarako. Euskaltelek hori du buruan, eta ez bakarrik Debagoieneko herri horietarako, baita Bizkaiko herri batzuetarako ere. Kontua da, Lekeitio eta inguruko herrietara kablea eramatea oso zaila izango dela, eta kasu horietan Iberdrolaren sarea erabiltzea litzateke irtenbide posible bat. Esan bezala, orain aukera hori ari dira aztertzen, eta emaitza onak emanez gero, Leintz Gatzaga eta gainontzeko herriak 2.007garren urtea baino lehen egongo lirateke Informazioaren Gizartea delakoan.