La Vanguardia ere hasi da zati batzuk kobratzen

Otsailaren 1ean La Vanguardia egunkari digitalak erabat aldatu zuen diseinua. Orain antza du El País eta International Herald Tribune egunkariekin. Hiruretan oso nabarmenak dira espazio zuriak eta letratipo urdinak.

Dena dela, diseinua alde batera utzita, La Vanguardia albiste da kobratzen hasi delako hainbat eduki. Baina ez du dena kobratzen, El Paísek bezala. Nahiago izan du The New York Times egunkari amerikarraren eredua, eredu mistoa. Honen arabera, aurrerantzean irakurlea izan liteke bisitaria, izena emandako erabiltzailea edo harpideduna on-line.

1. Bisitaria. Irakurlea bakarrik sar daiteke egunkariaren azalera eta kanal komertzieletan.
2. Izena emandako erabiltzailea. Kasu honetan irakurlea sar daiteke, doan, eguneko edukietan. Horretarako, baina, hainbat datu eman beharko dizkio egunkariari, honek erabil ditzakeena bere publizitatea antolatzeko.
3. Harpideduna on-line. Formula hau ordainpekoa da. Eguneko edukiez gain, harpidedunak eskura izango ditu PDF formatuan La Vanguardiaren hemeroteka, 1881ean sortu zenetik. Baita bilatzaile bat, eskuratzeko edozein informazio 1999a ezkeroztik argitaratua. Eta beste hainbat zerbitzu, hemen ikus dezakezuen bezala.

Harpidetza motak

Hiru harpidetza mota eskaintzen ditu La Vanguardiak:

• Urtekoa. 80 euro balio du.
• Urte erdikoa. 50 euro.
• Digitala eta paperezkoa. Bien harpidetza eginez gero, urtean 95 euro.

Eredu mistoa nagusitzen?

La Vanguardiak alde egin du El Paísen bidetik, ez ditu irakurleak uxatu nahi, eta erdibidea aukeratu du: dena barik, zati batzuk kobratzea. Horretan bat dator El Mundo eta Diario de Navarra egunkariekin. Badirudi, beraz, bide hori ari dela nagusitzen gure inguruan.

Ramon Salaverria adituaren iritziz, bide hau aukeratu dutenek atxiki nahi dituzte gaur egun dituzten ahalik eta irakurle gehienak, harik eta publizitatea itzultzen den arte egunkari digitaletara.

Amaitzeko, irakurle batek nabarmendu du La Vanguardiaren lehen orria oso arina dela (43 byte). Aldiz, El Paísenak 13.000 byte ditu. Hor, katalanak irabazle.