Teknologia albisteak
7

Sustatuk Argia Saria 2003 jasotzea egin du

Erabiltzailearen aurpegia
sustatu - sustatu
2003-01-24 : 17:01

Nabarra aldizkaria, Lauretan Babel, Lau haizetara, Publis agentzia, Herri Irratia eta zuk irakurtzen duzun weblog hau izan dira aurtengo sarituak. Sustatu.com-i dagokionean Sustatun parte hartzen dugun guztiona da saria. Zuri tokatzen zaizun neurrian, ZORIONAK!

Giro onean banatu dira aurtengo Argia Sariak . "La creme de la creme" egon da Txintxardin Beltxa jatetxean. Oso ondo antolatutako ekitaldian (mokadu goxo-goxoak tarteko) Argia Sariak banatu dituzte. Aldizkariko telefonista Olatzek bi abesti eder eta ederki kantatu ditu, eta bertaratu direnek Zumetaren lanen erreprodukzio eta egutegi bana jaso dituzte erregalu bezala. Argiak erakutsi du behin berriz euskalgintzako planetilla guztioak unibertso berean elkartzen. Txintxardin Beltza ere ez da unibertso makala!

Sustatuko editoreak saria jasotzerakoan, weblogean parte hartu duten guztiei eskerrak eman dizkie, baita eguneroko lanean bidaialagun dituen Code & Syntax enpresa eibartarreko maisu-maiestrei ere.

Hainbat aurkezlek, Argiakoak denak, Aurtengo Argia saridunak aukeratzeko arrazoiak irakurri zituzten ekitaldian. Hauexek saridunak eta baita antolatzaileek esandako zergatiak:

Argia 2003 irabazleak

  • Prentsa idatzia: Nabarra aldizkaria

Euskarazko aldizkarien esparrura bidai lagun berri bat elkartu zitzaigun 2001ean. Baldintza zailetan jaio zen eta baldintza zailetan ekin dio bideari bizitzako lehen urte honetan. Kastari dagokion legez apustu ausarta egin dute eta duintasun osoz, formatu erakargarriz eta kalitatez erantzun diote, euskararen aldeko urrats eta mugimendu guztiak oztopatu nahi dituen Nafarroako Gobernuari.

  • Irratia: Euskadi Irratiko Lauretan Babel saioa

Informazioaren munduan gabiltzanok badakigu ez dela batere erraza, eduki interesgarriak modu atseginean eta irakurle, entzule edo ikusleentzat erakargarria eta gustagarria izateko moduan eskaintzea. Saio honetako lantaldeak lortu du kultura eta gizarte gaien ikuspegi zabal eta aberatsa belarrien gozagarri bihurtzea eta informazioa eta entretenimendua era orekatu batean uztartzea. Horregatik eskaini diogu 2003ko ARGIA SARIA Euskadi Irratiko “Lauretan Babel” saioari, hain justu ere, arratsaldeko laurak aldera.

  • Telebista: Euskal Herria lau haizetara

Telebista batez ere irudia da. Baina baita hitza ere. Euskal Telebistaren eskaintzan mugarria markatu duen eta urte hauetan nortasun berezia irabazi duen programa batetaz ari gara. Aurreko urteetako ibilbideari iazkoan atal, irudi eta eduki berriez indartu du. Programa egiten duen lan-taldeak gainera, bidean galdutako lankideen izpiritu, mezu eta lan egiteko moduari eutsi diote, bere txikitasunean Euskal Herria zein ederra, ezezaguna eta interesgarria den ezagutaraziz. Telebistari begira deskubritu dugu Euskal Herria. Bihotzez, elkarrekin bidaiatzen jarrai dezagun Telebista ataleko ARGIA SARIA Lau Haizetara programarentzat izango da aurten.

  • Publizitatea: EITBren irudi kanpaina diseinatu duen Publis agentzia

Ez da erraza publizitate munduan nabarmentzea, helarazi nahi duzun mezua gizartean txerta dadin lortzea eta are gutxiago jendearen hizpide bihurtzea. Gutxik lortzen dute hori, medioak eskuartean izanda ere. Sarituko dugun kanpainak hori guztia lortu du: euskal medio garrantzitsu baten irudi erakargarri eta berritzailea gizarteratu du, lehena, oraina eta geroa uztartuz, gure ohiturak mundu zabaleko testuinguruan kokatuz eta komunikazioaren erotika erotikaren komunikazio ere bilakatuz. Harriak, begiak, musika, txapelak eta aulki kulunkariak, hizkuntza publizitarioaren langai hartuta, marka irudi erakargarri, sustraitu eta modernoa sortu dute. 2003ko Publizitate saria Publis Agentziak jasoko du, EITBrako landu duen irudi kanpaina dela medio.

  • Merezimenduzko Saria: Herri Irratia

Berrogehi urte bete zituen iaz. Eskarmentu handiko gazte baten aurrean gaude. Frankismo garaian sortua, urte luzetan euskaltzale guztien ereferente ia bakarretakoa izan zen, eta zailtasunak zailtasun, erreferente izaten jarraitzen du. 40 urte luze hauetan asko eman dio euskal komunikazioaren esparruari: profesionalen harrobi eta habi izan da, guztion oroimenean daude euskararen alde antolatutako ekimenak eta jasan dituen erasoak. Euskararen eta Euskal herriaren aldeko mezua, erdaldunen artean ere zabaldu du. Irrati maitatua eta kuttuna. 40 urte hauetako ibilbidea saritu nahi izan dugu, sinestuta, beste horrenbesterako indar, kemen eta ilusio ere baduela. 2003ko Merezimenduzko saria Herri Irratiarentzat izango da.

  • Sareko Argia Saria: sustatu.com

Albisteak eta informazioa lantzeko eta aurkezteko modu berritzailea batekin sareratu ziren eta euskal internauten tribuan erreferente saihestezina bilakatu dira denbora laburrean. Informazioa eskaintzeaz gain eztabaida eta hausnarketa bultzatu nahi izan dituzte eta lortu dute. Garai bateko tertulien zaporea, prentsako irakurleen gutunen oihartzuna, ideien erakusleiho eta batez ere, eztabaidarako plaza. Pantaila txiki horretan, euskal munduan dauden iritzien aniztasuna jasotzen eta erakartzen asmatu du. Eta ahalegin hori saritzea eta sustatzea merezi duelakoan, 2003ko Sareko Argia Saria Sustatu.com-entzat izango da.

Zorionak saritu guztiei eta baita, nola ez, etxekoak zareten guztioi. Denon ahaleginarekin Sustatuko lagun taldea handitzea lortu dugu.

Erantzunak

patxi gaztelumendi
2003-01-24 : 19:37

Zorionak Sustatu!



Zorionak Iban Arantzabal nekaezin hori. Zorionak weblog honetan idatzi, partehartu, gogoeta egin, irakurri eta parte hartu duen guztioi.

Komunikazio irekiaren alde gauden neurrian, sari hau izan dadila, komunikazioa bera sustatzeko.

Euskal interneten panorama hobetzeko balio beza sari honek.

Sustatu dezagun orain, webgune berri gehiago sortzea. Zirika dezagun jendea interneten bere lanak paratu ditzan.



Aupa Iban, larriki saritua zauden honetan!

anboto durangaldeko astekaria
2003-01-24 : 20:36

Durangaldeko paperezko aldizkarikoek ere sustatu egiten duten guztiak zoriondu gura ditugu eta, teknologia berrietan ere, gure hizkuntzak lekua baduela erakutsi duten guztiei.

Urtebetean sekulako zale mordoa bildu da sustaturen ingurua eta hori zor zaiona aitortu behar zaio.

Zorionak egitasmoaren sortzaileei, jarraitzaileei eta, jakina, editore "majo" horri!

Eutsi horri

M.A. Elkoroberezibar
2003-01-24 : 22:33

Zorionak guztioi eta bereziki Iban nekaezinari. Hain denbora gutxian hainbeste lortzea ez da kasualitatea; atzean lan handia eta ilusioa dagoela antzematen da. Segi horrela.

Sorgintzulo
2003-01-25 : 00:08

Zorionak. Merezi duzue. Benetan. Segi aurrera!

josu telletxea
2003-01-25 : 21:58

Besteri gabe zorionak, sustatuko sustatzaileei



Segi honela



JOSU

editorea
2003-01-27 : 19:31

Zorion zaparrada jaso dut eta orain zorion horiek errepartitu gura nituzke berriz. Pribatuan jaso ditut asko eta baita Sustaturen bidez ere (Patxi, Migel Angel, Josu, "Sorginzulo", Anbotoko lagunak...). Lankideak ere izan bultza egiten egunero-egunero daudenak... Ekitaldian ere Sustatutik ezagun dudan jendea gertuan izan nuen...



Zoriontzekoak zuek zarete. Bereziki, Sustatun parte hartzen duzuen guztiok eta baita irakurle zaretenok ere.



Saria jasotzean esan nuen moduan, Goienak apustu handia egin du sarean eta horrek erantzuna jaso du. Bidelagun izan diren C&S-koak ere ezin ahaztu, proiektu honetan gure beste indar egin dutelako eta maisu-maistra ezinbeseko izan direlako guretzat.



Emandako oroigarria ezingo dugu zatitu, baina jaso ezazue zati birtual bat, gutxienik.



Argiakoei ere eskerrak. Norbere buruari saririk ematen ez dira hasi hauek, baina beste epaimahai posiblerik balego, seguru "Sareko Argia" Argiako Internet sailak jasoko lukeela. Zorionak zuei ere egiten duzuen lanagatik.



Iban Arantzabal

editorea

editorea
2003-02-04 : 11:22

Artikulu honetan ematen du Argiak bere sarien berri. Sustaturen kasuan, diote:

Internet - Sustatu, web log formula euskaldunen artean zabaltzen

Goiena taldeak teknologia berriei ezin zitzaiela muzin egin ikusi zuen eta horrela sortu zen Sustatu web gunea, Goienaren beste adar bat bezala. Duela ia bi urte, 2001eko apirilean, helarazi zen lehen mezua eta harrezkero, albisteak, erantzunak eta galderak etengabeak izan dira.
Hain denbora gutxian web log deritzon formula euskal hiztunen artean zabaltzea lortu dute. Hau da, prentsako irakurleen gutunen ohiartzuna, ideien erakusleiho eta batez ere eztabaidarako plaza bilakatu da. Azken batean Internet erabiltzaileak dira Sustatuk duen informazio iturri garrantzitsuena, beraiek bidaltzen baitituzte albiste bihurtzen diren mezuak, ezen internauten parte hartzerik gabe Sustatu ez bailitzateke gauza bera izango.
Iban Arantzabal Sustatuko editoreak argitu digunez, hasieran komunitatea txikia zenez bertatik lan handia egin behar izan zuten albisteak zabaltzeko eta tresna ezagutarazteko, baina pixkanaka «euskaldunak Interneten idazteko beldurra galdu du. Horrela, web guneak irabazi egin du eta baita albisteak emateko moduak ere». Euskal Herrian web log formula gizarteratu zuten lehenak izan ziren. Baina beren esperientziak fruituak eman ditu, euskal internauten artean erreferente bilakatu baitira. Horregatik, urtarrilaren 24an Argia Saria eskuratu zuten, pantaila txiki batean euskal munduan dauden iritzien aniztasuna jasotzen eta erakartzen asmatu baitute.

Ñabardura pare bat besterik ez: 2001eko apirilean barik, 2001eko azaroan hasi zen martxan Sustatu, eta 2001eko abenduan aurkeztu zen publikoki prentsaurrean. Eta Goienaz gain, beste enpresa bat ere badago ekimen honen atzean: Code & Syntax. Eskerrik asko berriz ere Argiari eta Sustatuzale guztiei!

Erantzun

Twitter ikonoa  Facebook ikonoa  Sartu