Teknofiloen albistegia

"Xake Zakurtzarrari": euskarazko xake jokoa

Erabiltzailearen aurpegia
Asier Ibaibarriaga
2002-12-23 : 10:12

Bilbao Hotelean, PCrako “Xake Zakurtzarrari” deritzan xake jokoaren aurkezpen ekitaldia burutu zuen Bizkaiko Ikastolen Elkartearen eskutik. Bertan izan ziren baita Bizkaiko Foru Aldundi eta Eusko Jaurlaritzako euskara sustapeneko arduradun nagusiak.

Ia urte eta erdiko lanaren ondorio da “Xake Zakurtzarrari” deritzan Pc-rako xakeko joko hau. Lan hau burutzeko jende askoren partaidetza izan da beharrezko. Alemaniako Chessbase etxearekin elkarlanean, Debako Jon Esturo eta Ermuko Asier Ibaibarriaga aritu dira xake aditu bezala jokoak eskaintzen dituen menu eta pantaila guztien itzultze lana burutzen. Beraiekin batera Ikastolen Elkarteko Nerea Arregi eta Igor Tellitu aritu dira orrazketa, zuzenketa eta informatika beharrak burutzen. Hauez gain, Erramun Osa, Juanjo Respaldiza eta abar luze baten eskuetatik ere pasa da merkaturatu baino lehen.

Zakur bat dugu jokoaren oinarri. Zakur zirikatzailea berori, hiztuna, adarjotzailea. Berari ahotsa jarri diona ere ezaguna, Iñaki Beraetxe aktoreak bete baitu egin behar hau. 6 urtetik aurrera edozein adinetara egoki liteke, guztira 10 maila ezberdinetan jokatzeko aukera eskaintzen baitu.

ake jokoaz gain, xakeari buruzko hiztegi bat ere agertzen zaigu jokoarekin batera. Gazteleraz, euskaraz, frantsesez eta ingelesez, xake munduan erabiltzen diren hitz esanguratsu guztiak jasotzen dituen hiztegi bat. Horrez gain, Nazioarteko Xake Federazioak (FIDE) kaleratzen duen xakeko arautegi osoa euskaraz eta xakean nola jokatu eta berori ikasteko oinarrizko pausoak azaltzen dituen gehigarriak.

Egileen aburuz, joko honekin egin den ekarpen nagusia, xakeak euskaraz zuen hutsunea betetzea izan da. Euskarazko hiztegiaz gain, ahoskera eta idazkera nola izan behar den azaltzeko lehen pausoak eman baitira.

Durangoko azokan salgai egon zen eta jendearen harrera benetan beroa izan du. 150 ale inguru saldu ziren Durangon eta epe motzera Euskal Herriko Ikastola gehienetan barrena hedatuko da.

Informazio gehiagotarako zanpatu hemen.

Erantzun

Twitter ikonoa  Facebook ikonoa  Sartu