Sareko El País, ordainduta
Musu truke ez da ezer. Horixe erabaki du Prisa komunikazio taldeak eta horregatik, datorren astetik hasita, El País egunkariaren sareko bertsioa irakurri nahi duenak, ordaindu egin beharko du: egunean 20 zentimo.
Iraultza, balio erantsia eta dimentsio berria aipatzen ditu El País egunkariak iragartzen duenean datorren astetik aurrera kobratzen hasiko dela sareko egunkaria.
Zertan oinarritzen da, baina, hori esateko? Diseinu berrian. Prisacom taldeak goitik behera berdiseinatu du El País.es eta horren karian konbentzitu nahi ditu bere irakurleak ordaintzen has daitezen egunkaria irakurtzearren.
Hemen ikusiko duzuen legez, diseinu berriak antz handia du Cinco Días sareko egunkari ekonomikoarekin, hau ere Prisa taldearena.
Zer eskaintzen duen diru truke
Prisak berak dio egunero milioi erdi bisita dituela El País.es egunkariak. Aurretik The Wall Street Journal edo The Economist hedabideek egin duten bezala, egunkari espainiarrak nahi du dirua irabazi bisitarien kontura. Eta horretarako hainbat zerbitzu eskainiko die:
- Informazio eguneratua egunaren 24 orduetan.
- Infografia biziak.
- Elementu multimediak.
- Elkareraginkortasuna.
- Aukera El País-en artxibo historikoan sartzeko.
- Aukera jaisteko paperezko edizioa PDF formatuan.
- Lurraldeetako edizioak eta gehigarriak.
Zerbitzu hauekin batera, edizio berriak aukera gehiago eskainiko ditu, Sustatuk bezala: azken albisteak eta albisterik irakurrienak ikustea, konparazione.
Harpidetza motak
Jasotzen dutenek paperezko edizioa harpidetza bidez, doan jasoko dute edizio digitala. Besteek, bi aukera izango dituzte harpidetza egiteko: urte osoko harpidetza 80 euroren truke; edo urte erdikoa, 50 eurotan.
Abenduaren 31 bitartean, ordea, nahi duenak astebeteko froga bat egin lezake, erabat doan. Aldi horretan jasoko ditu eduki guztiak harpideduna balitz bezala.
Aspaldidanik bizi naiz ni albiste hau bezalakoen beldur: noizko sarean doan diren zerbitzu asko ordainduak bihurtuko?
Izan ere, zeharo musu truke ez da izan sareko El Pais orain arte; sarean konektaturik egotea ez delako doan. Telefono hornitzaileari pagatu behar diogun dirua ez doala Prisaren eskuetara badakigu, baina horrek ez du esan nahi guk sareko bertsioa irakurtzeagatik ez dugula pagatzen. Lastima, hori bai muntaketa kaskarra Prisarako!
Agaian 80€ko harpidetza honen bidez Prisak diru apur gehiago irabaziko du sareko bertsiotik (iragarki elektronikoetatik gutxi irabazten omen zuen eta). Baina apur bat bakarrik edo asko? Nik apur baten utziko nuke, nire boltsikotik izan behar baldin badu. Hala izan da nire esperientzia antzeko beste kasuekin: boladatxo batez Encyclopædia Britannica debaldekoa zen eta askotxo erabiltzen nuen kontsulta moduan; ordaindukora pasatu zenean, erreten aldatu eta Encartara jo. Honekin gauza bera gertatu zenean, biak ahaztu eta Googlera zuzenean. Beti egongo baita datuak libre pasatzen utziko duen erreten zabalago bat!