ET euskaldunaren bila

Jakina da hainbeste eta hainbeste ordenagailuk pantaila-babeslea jarrita dutela. Norbaiti bururatu zitzaion pantaila babesle horren ordez lan produktiboren bat egin zezakeela ordenagailuak, arrainontzi tonto edo hodi sare ezagun horiek erakusten jardun beharrean.

Bestetik, Arecibo-ko obserbategian etenik gabe jasotzen dituzte kanpoko espazioko irrati seinaleak. Gehienak interferentzia hutsak, irratia ondo sintonizatuta ez daukagunean entzuten diren bezalako soinuak. Baina baliteke tarteka seinale adimentsuren bat jasotzea. Baina, nor ibiliko da hainbeste denbora seinale guztien artean zerbait aurkitzen?

Bi gai hauek uztartuz sortu da SETI@home (Search for Extra Terrestrial Intelligence at Home) proiektua.

Erabiltzaileak pantaila-babesle berezi bat instalatzen du bere ordenagailuan. Ordenagailuaren aisialdi momentuetan, (hots, pantaila-babeslea aktibatzean) internetetik jasotako seinale fitxategiak analizatzen hasiko da. Bukatzean, emaitza zerbitzari zentralera itzuliko du, dena automatikoki.

Erraz parte har daiteke:

• Proiektuaren webgunera joan.
• Helbide honetan programa deskargatu eta norberaren ordenagailuan instalatu.
• Oinarrizko datu batzuek eman, eta listo!

Gainera, talde batetan integratu zaitezke, taldeko emaitzak batu daitezen. Horretarako Euskal Herriko SETI taldera gehitu zaitezke. Adibidez, momentu honetan 15.000 urtetako ordenagailu jarduna egin dugu taldea osatzen dugun guztion artean.

Kontutan izan ez dela beharrezkoa eguneko 24 orduak internetera lotuta egotea. Fitxategi deskarga eta emaitzen bidalketa egiteko nahikoa dira pare bat edo hiru minutu.

Estralurtarrik aurkituko dugun? auskalo!