Behatokia Newsletter aldizkariaren zenbaki berezia

Hizkuntz Eskubideen Behatokiak Behatokia Newsletter aldizkari digitalaren ale berezia banatu du nazioartean Nafarroako Gobernuaren 372/2000 dekretuaren inguruan gertatutakoaren berri emateko. Jakina denez, Nafarroako Auzitegi Nagusiak baliogabetu egin du azken urte eta erdian euskararen erabilera ofiziala nabarmen murriztu duen dekretu hori.

Behatokiaren aldizkarian azaltzen denez, dekretu horrek ondorio latzak izan ditu indarrean sartu zenetik, euskara desagertze bidean jarri baitu Nafarroako Administrazioan: gure hizkuntza ia ezabatu egin dute agiri eta kartel ofizialetatik, euskara eskakizuna zuten lanpostuak nabarmen murriztu dira, eta areagotu egin dira zerbitzu publikoak euskaraz jasotzeko zailtasunak.

Dekretua baliogabetu izana berri pozgarritzat jo du Behatokiak, baina, hala ere, erne jarraituko duela iragarri du, orain arteko hizkuntz politika zuzendu beharrean, dekretu murriztailea berriro tramitatzeko asmoa agertu du eta Nafarroako Gobernuak.