Hainbat komunikabide S.A musika taldearen kontra
Dagoeneko udan gaude, eta udan nahi adina kontzertu izaten dira. Batzuek ordea, nahikoa lan kontzertu bat eman nahi badute. Internetetik jasotako e-posta batek pikutara bidali ditu Sociedad Alcoholica talde gasteiztarrak aspalditik hitzartuta zeuzkan hainbat kontzertu. E-mail horretan, ezezagun batek S.A taldearen kontrako hitzak jasotzen ditu. S.A-koak ETA-ren aldekoak direla, arrazistak, xenofoboak, antisemitak eta abar luze bat.
Luis del Olmo kazetariak e-maila jaso eta "Protagonistas" saioan solaskideekin batera, berba gai izan zuten. Hortxe ere sekulakoak esan ziren, eta horrek, noski, azken asteotan sekulako zurrunbiloa sortu du.
Kontua da, irratsaioan esan ziren guztiak esan eta gero, eta kontu horren gainean idatzi direnak idatzi eta gero, Sociedad Alcoholica taldeak estatuan aspalditik hitzartuta zeuzkan hainbat kontzertu bertan behera geratu direla. S.A taldearen webgunean azaltzen denez, hainbat udaletxek kontzertuak bertan behera uzteko izan duten presioa sekulakoa izan da. Alkateren baten dimisioa ere eskatu omen da, kontzertuak aurrera egin dezan asmoa agertu duelako.
Salaketa jarriko dute
Sociedad Alcoholica taldeak hainbat komunikabide eta kazetari salatzeko asmoa agertu du. Esan diren guztiak funtsik gabekoak direla argitu dute S.A taldekoek, eta beraien webgunean argi eta garbi uzten dute dena. Horrez gain, adierazpen askatasunaren kontrako ekintza bat dela salatu dute, eta euskal kutsua daukan edozeren kontra egiteko asmo garbiak daudela ere.
Sociedad Alkoholika taldearen letrak irakurri nahi izanez gero klikatu hemen..
Azkeneko asteotan gai horren inguruan idatzi diren artikulu batzuk irakurri nahi izanez gero;
Luis del Colmok berria eman baino lehen, S.A.ren kontrako artikulutxo bat agertu zen www.elconfidencialdigital.com -en. Webgune hori izan zen hautsak harrotu zituen lehena.