Nola kakaztu Euskal Herriko kooperatibak
Boladan dago, bai, Espainiako zenbait hedabidetan euskaldunen aurka egitea. Neonaziena da adibide bat, baina badira beste batzuk ere. Libertad Digital izeneko medioarena bereziki latza da gero.
Euskal Herriko kooperatiben kontrako erasoak, adibidez, indar handia hartu du joan den maiatzaren 29an atxilotu zutenetik Caja Laboraleko barne auditorietako arduraduna.
Sartzen bazarete Libertad Digital izeneko webgune honetan, ikusiko duzue nolako astakeriak esaten diren, atxiloketa hori dela eta, Euskal Herriko kooperatiben kontra, eta bereziki MCCren aurka.
Artikulugileak dio betidanik izan duela susmoa MCC lotuta dagoela ETArekin, eta korporazioa erabili dela talde armatuaren dirua zuritzeko. Ez bide da kasualitatea MCC Arrasaten egotea, “ETAren sehaskan”. MCC inplikaturik omen dago, zuzen edo zeharka, sustatzen eta ezkutatzen estrategia nazionalista, bere bi aurpegietan: EAJrena eta ETArena.
Frogak
Egileak ez du frogarik ematen. Baieztapen mordoa egiten du, jantzita zenbait webgunetan aurkitutako testu batzuekin, esandakoek egiantza izan dezaten.
- MCCren zuzendaritzan politikari abertzaleak dira nagusi: Oliveri, Ormazabal, Retegi, Ardanza...
- Eroskik saltzen ditu bere dendetan liburu abertzaleak eta euskal separatismoan nabarmentzen direnak.
- Caja Laboralek era guztietako diru bilketak egiten ditu, terroristen interesei lotuak.
- Caja Laboralek inoiz ez du ETAren atentaturik jaso.
- Caja Laboralek diruz laguntzen die Euskaltzaindiari, Eusko Ikaskuntzari eta ikastolei.
- Kooperatiben kontseilu sozialetan, abertzaleak dira nagusi.
- Mondragon Unibertsitatean abertzaleak saiatzen dira dotrina abertzalea irakasten.
- Irakasle Eskolako ikasleek praktikak egiten dituzte Venezuelan eta Mexikon, "ETAren adiskideak".
Artikulugileak aurrera egiten du eta izen gehiago aipatzen ditu (Jon Sarasua, josulagunak, Xabier Arzalluz...), denak zabor berean nahasteko.
Erantzunak
Libertad Digital, gotzainena eta beste batzuk irakurri ostean, pentsakizun bat:
Maiatzaren 13aren aurreko zaparrada antiabertzalea izan ei zen Ibarretxeren
boto metatzaile handietako bat. Norbaitek esan zuen, beste astebete eta beste 100000 boto...
Orduko zaparradaren neurria gainditzen dihardute orain, ez bakarrik dialektikoki, bistan da.
Ba, Ibarretxek, herri konsultarik, erreferendumik edo dena delakorik batek daki ze galderaren gainean egin nahi badu, egingo badu inoiz, ORAIN du momentua. Madrilek antolatutako kanpaina honekin, irabaziko du seguro, zer galdetu ere.
MCCri buruz editoriala ere bai Libertad Digital-en.
Euskal gotzainen pastorala ere ezin izan du komentariorik gabe utzi medio honek. Horra Federico Jimenez Losantos-en bat, eta beste kolaboratzaile baten beste bat.