Teknologia albisteak
4

Sustatuzaleok, gonbidatuta zaudete!

Erabiltzailearen aurpegia
Idoia Larrañaga - Jakoba Taberna
2002-05-17 : 14:05

Datorren igandean, maiatzak 19, Jakoba Taberna irekiko dut Elorrion eta, lerro hauen bidez, Sustatu erabiltzen duzuen lagun guztiak gonbidatu nahi zaituztet gurekin ospatzera. Eguerdiko 13:00etik arratsaldeko 15:00 bitartean jana eta edana banatuko da, ugari eta doan. Trikitixa ere izango dugu.

Jakoba Taberna Erreka kalean dago eta aspaldikoa da, izan. Fidel Azkoagak ireki zuen antzina eta urteetan berak eta bere familiak gobernatu zuten.

Orain nik hartu eta beste modu batera antolatuko dut. Batez ere ogitartekoak eskainiko ditut —hori izango da nire espezialitatea—, entsaladak eta sorpresaren bat edo beste, haizeak nondik jotzen duen.

Taberna eta lehengo jantokia bat eginda egongo dira. Beraz, jendeak gogokoago duen eremua aukeratuko du mokadu bat jan, musika entzun eta berriketan egiteko.

Igandekoa aro berriaren inaugurazioa izango da. Ateak ireki, berriz, maiatzaren 23an egingo dugu, ostegunean. Sustatuzaleok igandean duzue aukera polita elkar ezagutzeko eta ondo pasatzeko Jakobaren kontura. Gonbidatuta zaudete!

Idoia Larrañaga

Erantzunak

Larraitz eta Oskar
2002-05-17 : 19:04

Seguru kristolako giroa izango dozuela.

Gu ezingo gara juan, Donostiako maratoi erdian izango gara eta, baina gu bion partetik sorte asko!!!



Miren
2002-05-17 : 19:50

Aupa, Ido! Eskerrik asko gonbitagatik. Gu hantxe izango gaituzu, bazterrak nahasteko gertu. Domeka arte!


Anje Aranzeta
2002-05-19 : 13:40

Musika ona badago nik ere joateko asmoa dut. Elorrio urrun xamar geratzen zait, baina dena den, elkarguneak ia merezi duen.



Baina zein musika estilokoa da taberna hori? Jakin badakit jangela handia duela...



Dutxa fresko-fresko bat hartu eta ia lagunen batekin joaterik dudan. Ahal badut oraintxe arte.

Idoia Larrañaga
2002-05-20 : 00:07

Eskerrik asko etorri zareten guztioi. Oraindik gogoratu ezinik nabil tabernatik pasatu zareten guztiok. Izan ere, hainbeste jende pasatu da Jakobatik: elorriarrak, familiartekoak eta, nola ez, Sustatuzaleok.


Luistxo eta Gari izan dira goiztiarrenak. Luistxo Perurekin etorri da, mutiko hilehori bihurritxoa. Garik, berriz, Laura eta Andoni ekarri ditu, emaztea eta hilabete bateko umetxoa. Koitaduak aingeruek bezala egin du lo. Eurekin batera, baina, mutil guapo bat ekarri dute, Parisen bizi eta artista hutsa omen dena Zope kontuetan. Oker ez banago, David du izena eta, esan didanez, asko gustatu zaio Jakoba. Halako batean igoal eskatuko diot webgune berezi bat egiteko nire tabernarentzat, nork jakin.


Etxekoak geroago agertu dira: Joxe eta Mikel. Hauek barruan eta kanpoan izan dira, honekin berriketan eta harekin solasean.


Ni ere, egia esan, horrelaxe ibili naiz. Orain neka-neka eginda nago, baina pozik, azkenean abiatu garelako eta animo hitz asko jaso ditudalako. Datozen hiru egunak aprobetxatuko dugu tabernari azken ukituak emateko eta ostegunean irekiko ditugu ateak, behin betiko.


Mila esker etorri zareten guztioi eta eguraldi zoragarria beste zerbait egiteko aprobetxatu duzuenoi. Batzuek eta besteek badakizue non gauden. Lagun bat duzue Jakobanean.


Erantzun

Twitter ikonoa  Facebook ikonoa  Sartu