Hizkuntza, Israelen gerrarako tresna Palestinaren aurka
Israelgo Haaretz egunkariak gaur azaltzen duenez, Israel Broadcasting Authorityk (Israelgo telebistako agintea) arau zorrotzak eman ditu arabieraz egiten dituen saioetan erabili beharreko hizkuntzari buruz. Adibidez: palestinar zibilak ez dira «biktimak», hilda gero ere. Hitz hori bakar-bakarrik israeldarrei buruz erabil daiteke.
Israelgo telebistak arabieraz ematen dituen saioek gutxi gorabehera 1,2 milioi arabiar ikusle dituzte, Israelgo herritarren artean. Erran nahi baita ikusle horiek israeldar naziotasuna dutela arabiar ikusle horiek denek.
Adibide harrigarriak ematen ditu Haaretz-ek. «Okupazio» hitza ez daiteke erabil, non eta ez den hitzez hitz egindako aipamen bat. Palestinar edo arabiar baten esanak aipatzerakoan, ezin da aurretik «azpimarratu zuen» edo antzeko esamolderik ipini, bestela «entzulearen atxikimendu gehiegizkoa» bultza baitezake.
Israelgo armadako ofizialeren batek Jeninen egindako sarraskia guztiz gezurtatzeko esandakoak aipatzerakoan, ez da aski «gezurra da» esatea, ez horixe: aditzak indar bikoitzez adierazi behar dira, adibidez amaieran esanez «ustezko gertaera horiek guztiz gezurrezkoak, oinarri gabeak eta egiaren aurkako biribilak dira».
Azkenik Knesset-eko (Israelgo Parlamentua) kideren bat Ariel Sharonek esandako hitzen aurka mintzatzen baldin bada, informazioa ematerakoan aditz batzuk debekatuta daude. Ezin da «gezurtatu» edo «ukatu» esan, baizik gehienez ere «zehaztu» edo «eragozpenak azaldu».
Berria osorik hemen:
Ingelesez http://www.haaretzdaily.com/
Hebraieraz http://www.haaretz.co.il/
Hitzen bidez errealitatea benetan sortu eta menderatzen da? ala ez? Egia da Newspeak orwelliano bat sortuz irakurle/entzuleen ideiak kontrolatzen ahal ditugula? Badirudi Israelek hala sinesten duela... Baina egia ote?
Alderantzizko irakasgaia eman dezakeen pasadizoaz irakurri berri dut liburu batean. Sobiet Batasunean gertatu zen, Brejnev-en garai grisean. Emakume gazte bat atxilotu zuten Leninen hilobian eskupaperak banatzen ari zela (ausarkeria galanta sasoi hartan). Paperok atzeman eta hara goardien sorpresa: hutsik zeuden. Emakumeak esan omen zien: "Zertarako lana hartu idazten? Denek ulertzen dute!"