Teknologia albisteak

Nafarroako Bertso Txapelketak badu finala

Jon Abril - Nafarroako Bertsozale Elkartea

2002-04-08 : 13:04

Ekialdean euskarak jasaten dituen etengabeko erasoen aitzinean, kontraerantzuna badugu. Bertako bertsolariek, bertako hizkuntzan kantatuko dute Nafarroaren izena daraman txapelketa bateko finalean, txapela beltza janzteko xedez.

Bertze urte batez Nafarroako Bertsolari Txapelketako finala jokatuko da, Donezteben oraingoan. Igandean izanen da, apirilaren 14a, arratsaldeko 16:30etatik goiti pilotalekuan. Zortzi bertsolari sailkatu dira finalerako: Sustrai Colina, Amets Arzallus, Xabier Silveira, Xabier Legarreta, Estitxu Arozena, Joxe Juan Zubieta Etxabe, Iñigo Olaetxea eta Bittor Elizagoien. Nafarroan urte guztian zehar euskara hutsez egiten den kultur ekitaldarik jendetsuena da txapelketako finala, eta hortik bere garrantzia.
Aurten, gainera, bertso liga jokatu ondotik etorri da txapelketa. Denetara Nafarroa eta Ipar Euskal Herriko 25en bat herritara heldu gara: Tuteratik Urruñara, Bidarraitik Berara, Lakuntzatik Garraldara eta Saratik Doneztebera. 50 lagunetik goiti ibili gara batean eta bertzean lanean. 1000 entzuletik goiti orain arteko saioetan, eta bertze horrenbertze espero ditugu igandean.